തിരൂര്‍: തുഞ്ചന്‍പറമ്പിന്റെ വികസനത്തിനാവശ്യമായ എല്ലാ സഹായവും സര്‍ക്കാര്‍ നല്‍കുമെന്നു ധനമന്ത്രി ഡോ. ടി.എം തോമസ് ഐസക്. തുഞ്ചന്‍ ട്രസ്റ്റ് ചെയര്‍മാന്‍ എം.ടി വാസുദേവന്‍ നായര്‍ തുഞ്ചന്‍പറമ്പിന്റെ ഭാവി വികസന കാര്യങ്ങള്‍ സംബന്ധിച്ച നിര്‍ദേശങ്ങള്‍ മന്ത്രിയില്‍നിന്ന് ആവശ്യപ്പെട്ടപ്പോള്‍ എല്ലാവിധ സഹായവും സര്‍ക്കാര്‍ കണ്ടറിഞ്ഞ് ചെയ്യുമെന്നും കാര്യങ്ങള്‍ സര്‍ക്കാറിനെ അറിയിച്ചാല്‍ മതിയെന്നുമായിരുന്നു മറുപടി.
ഡോ. തോമസ് ഐസക് തുഞ്ചന്‍പറമ്പിലെത്തി നിലവിലെ സാഹചര്യം നേരില്‍ കാണണമെന്നും ഭാവി വികസനത്തിനാവശ്യമായ നിര്‍ദേശങ്ങള്‍ അദ്ദേഹത്തില്‍നിന്ന് ആവശ്യപ്പെടണമെന്നും നേരത്തേതന്നെ ആഗ്രഹിച്ചിരുന്നതായി എം.ടി വാസുദേവന്‍ നായര്‍ പറഞ്ഞപ്പോള്‍ എം.ടിയുള്ള സമയത്തുതന്നെ തുഞ്ചന്‍ പറമ്പിലെത്താനായതും കാലിക പ്രസക്തമായ വിഷയത്തില്‍ രചിച്ച പുസ്തകം തുഞ്ചന്‍പറമ്പില്‍ എം.ടിയുടെ സാന്നിധ്യത്തില്‍ പ്രകാശനം ചെയ്യാനായതും ഭാഗ്യമായാണ് കരുതുന്നതെന്നും തോമസ് ഐസക് പ്രതികരിച്ചു. കാലോചിതമായ പുസ്തകം കോട്ടക്കല്‍ ആയുര്‍വൈദ്യശാലയിലെ ചികിത്സാ കാലത്ത് എഴുതി പൂര്‍ത്തിയാക്കിയത് തോമസ് ഐസക്കിന്റെ നിശ്ചയദാര്‍ഢ്യത്തിന് തെളിവാണെന്നും എം.ടി പ്രശംസിച്ചു.
'കള്ളപ്പണ വേട്ട: മിഥ്യയും യാഥാര്‍ഥ്യവും' എന്ന വിഷയത്തില്‍ മന്ത്രി തോമസ് ഐസക് രചിച്ച പുസ്തകത്തിന്റെ പ്രകാശന വേളയാണ് ഇരുവരുടെയും സുപ്രധാന സംഭാഷണങ്ങള്‍ക്ക് വേദിയൊരുക്കിയത്.