തേഞ്ഞിപ്പലം: ആലുങ്ങല്‍ അങ്ങാടിയില്‍ പ്രവര്‍ത്തിക്കുന്ന ആരോഗ്യ കേന്ദ്രത്തിന്റെ ശോച്യാവസ്ഥയ്ക്ക് പരിഹാരം കാണണമെന്ന ആവശ്യവുമായി നാട്ടുകാര്‍ രംഗത്ത്. കാലപ്പഴക്കം കാരണം ഹെല്‍ത്ത് സെന്ററിന്റെ പല ഭാഗങ്ങളും തകര്‍ച്ചയുടെ വക്കിലാണ്. ഷീറ്റുകള്‍ കാലങ്ങളായി തകര്‍ന്നുകിടക്കുന്നു.
ആരോഗ്യ കേന്ദ്രത്തിന്റെ ചുറ്റുമതില്‍ ഏതുനിമിഷവും പൊളിഞ്ഞുവീഴാറായ നിലയിലാണ്. സമീപത്തുള്ള മരങ്ങളുടെ വേരുകള്‍ ആഴ്ന്നിറങ്ങിയതുമൂലം മതിലിന്റെ പലഭാഗത്തും പൊട്ടുകളുണ്ട്. ആലുങ്ങല്‍ മദ്‌റസയിലേക്കും പള്ളിയിലേക്കും വിദ്യാര്‍ഥികളടക്കം നിരവധി പേര്‍ വഴിനടക്കുന്ന സ്ഥലത്താണ് മതില്‍ നിലകൊള്ളുന്നത്.
അപകടഭീഷണിയിലുള്ള മതില്‍ പൊളിച്ചു മാറ്റി പുതുക്കിപണിയണമെന്നാണ് ആവശ്യം. മതിലിന് ഭീഷണിയായ മരങ്ങളും മുറിച്ചുമാറ്റണമെന്ന ആവശ്യവും ഉയരുന്നുണ്ട്.
തേഞ്ഞിപ്പലം ജ്വാല സാംസ്‌കാരിക വേദിയുടെ പ്രവര്‍ത്തകര്‍ മുന്നിട്ടിറങ്ങി ഹെല്‍ത്ത് സെന്റര്‍ പരിസരം കഴിഞ്ഞ ദിവസം ശുചീകരിച്ചു.ഏറെ നാളായി കാടുപിടിച്ചു കിടന്നിരുന്ന സ്ഥലമായിരുന്നു ഇത്. ശുചീകരണത്തിന് ജ്വാല സാംസ്‌കാരിക വേദി പ്രസിഡന്റ് അസീസ് ചേളാരി,സെക്രട്ടറി എ.കെ.നാസര്‍,കെ.എം ആഷിഖ്,ജ്യോതിഷ്ബിജേഷ് തുടങ്ങിയവര്‍ നേതൃത്വം നല്‍കി.