അടിമാലി: പാല്‍വില വര്‍ധിപ്പിക്കണമെന്നാവശ്യപ്പെട്ട് ക്ഷീര കര്‍ഷകരുടെ നേത്യത്വത്തില്‍ അടിമാലിയില്‍ പാല്‍ നിരത്തിലൊഴുക്കി പ്രതിഷേധ സമരം സംഘടിപ്പിച്ചു. കേരള മില്‍ക്ക് സൊസൈറ്റിസ് അസോസിയേഷന്റെ നേത്യത്വത്തില്‍ നടന്ന പ്രതിഷേധ സമരത്തില്‍ മേഖലയിലെ വിവിധ ക്ഷീര സംഘങ്ങള്‍ക്ക് കീഴിലുളള നൂറുകണക്കിന് ക്ഷീര കര്‍ഷകര്‍ സമരത്തില്‍ പങ്കെടുത്തു. കന്നുകാലിയെ മുന്നില്‍ നിര്‍ത്തി അടിമാലിയിലേക്ക് പ്രകടനാമായിട്ടാണ് കര്‍ഷകര്‍ എത്തിയത്. സൂചന സമരമെന്ന നിലയില്‍ നടത്തിയ സമരം സര്‍ക്കാരിനും മില്‍മക്കുമെതിരെയുളള താക്കീതായി മാറി.
കെ.പി ബേബി സമരം ഉദ്ഘാടനം ചെയ്തു. പോള്‍ മാത്യു അധ്യക്ഷത വഹിച്ചു. മില്‍മ മുന്‍ മേഖല ചെയര്‍മാന്‍ പി.എസ്.സെബാസ്റ്റ്യന്‍ മുഖ്യപ്രഭാഷണം നടത്തി. പി.വി ജോയി, പി.ആര്‍ സലീംകുമാര്‍, സണ്ണി മുരിക്കാശ്ശേരി, ജോര്‍ജ്ജ് ചിന്നാര്‍, പാപ്പച്ചന്‍, തോമസ് കൂട്ടുങ്കല്‍ എന്നിവര്‍ സംസാരിച്ചു.