തൊടുപുഴ: ജില്ലാ സ്‌കൂള്‍ കലോത്സവം നാല് മുതല്‍ ഏഴു വരെ തൊടുപുഴയില്‍ നടത്തുമെന്നു ജില്ലാ വിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ എ അബൂബക്കര്‍ വാര്‍ത്താസമ്മേളനത്തില്‍ പറഞ്ഞു. ജില്ലയിലെ ഏഴ് സബ് ജില്ലകളില്‍നിന്നായി 3117 പ്രതിഭകള്‍ മാറ്റുരയ്ക്കും.
മുഖ്യവേദിയായ ജയ്‌റാണി ഇ.എം.എച്ച്.എസ്.എസില്‍ മന്ത്രി എം.എം മണി മേള ഉദ്ഘാടനം ചെയ്യും. പി.ജെ ജോസഫ് എം.എല്‍.എ അധ്യക്ഷനാകും. അഡ്വ. ജോയ്‌സ് ജോര്‍ജ് എം.പി, എം.എല്‍.എമാരായ റോഷി അഗസ്റ്റിന്‍, ഇ.എസ് ബിജിമോള്‍, എസ് രാജേന്ദ്രന്‍, മുനിസിപ്പല്‍ ചെയര്‍പേഴ്‌സണ്‍ സഫിയ ജബ്ബാര്‍, മുനിസിപ്പല്‍ കൗണ്‍സിലര്‍മാര്‍, ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യാ പൗലോസ്, ബ്ലോക്ക് പഞ്ചായത്ത് പ്രസിഡന്റ് ജിമ്മി പോള്‍, മറ്റ് ജനപ്രതിനിധികള്‍ എന്നിവര്‍ ചടങ്ങില്‍ പങ്കെടുക്കും. ഏഴിന് വൈകിട്ട് അഞ്ചിനു ചേരുന്ന സമാപന സമ്മേളനം മുനിസിപ്പല്‍ ചെയര്‍പേഴ്‌സണ്‍ സഫിയ ജബ്ബാര്‍ ഉദ്ഘാടനം ചെയ്യും. മുനിസിപ്പല്‍ വൈസ് ചെയര്‍മാന്‍ ടി.കെ സുധാകരന്‍ അധ്യക്ഷനാകും.
തൊടുപുഴ സെന്റ് സെബാസ്റ്റിയന്‍സ് എച്ച്.എസ്.എസ്, യു.പി സ്‌കൂള്‍, ജയ്‌റാണി ഇംഗ്ലീഷ് മീഡിയം എച്ച്.എസ്.എസ്, മുനിസിപ്പല്‍ ടൗണ്‍ഹാള്‍ എന്നിവിടങ്ങളിലായി എട്ട് വേദികളിലാണ് മത്സരങ്ങള്‍ നടത്തുന്നത്. നാലിന് രാവിലെ എട്ടിന് ജയ്‌റാണി സ്‌കൂളില്‍ രജിസ്‌ട്രേഷന്‍ ആരംഭിക്കും. തുടര്‍ന്ന് രചനാ മത്സരങ്ങള്‍ രാവിലെ 10ന് നടക്കും. ഡാന്‍സ് ഇനങ്ങള്‍ ജയ്‌റാണി ഇംഗ്ലീഷ് മീഡിയം സ്‌കൂളിലെ വേദിയിലാണ് നടക്കുക.
പഴയിടം മോഹനന്‍ നമ്പൂതിരിയുടെ നേതൃത്വത്തിലാണ് ഭക്ഷണം തയ്യാറാക്കുന്നത്. സെന്റ് സെബാസ്റ്റിയന്‍സ് പാരീഷ് ഹാളിലാണ് ഭക്ഷണം ക്രമീകരിരിക്കുന്നത്. 'ഗീന്‍ പ്രോട്ടോക്കോള്‍' കൃത്യമായി പാലിക്കുമെന്ന് ഡി.ഡി പറഞ്ഞു. പ്ലാസ്റ്റിക്ക് പ്ലെയ്റ്റുകളോ ഫഌക്‌സുകളോ ഉപയോഗിക്കില്ല.
തൊടുപുഴ ഗവണ്‍മെന്റ് വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ ആണ്‍കുട്ടികള്‍ക്കും ഗവണ്‍മെന്റ് ഹയര്‍ സെക്കന്‍ഡറി സ്‌കൂളില്‍ പെണ്‍കുട്ടികള്‍ക്കുമാണു താമസ സകര്യം ഒരുക്കിയിട്ടുള്ളത്. താമസ സ്ഥലവും ജഡ്ജസും പൊലിസിന്റെയും വിജിലന്‍സിന്റെയും പ്രത്യേക നിരീക്ഷണത്തിലായിരിക്കും. വാഹന പാര്‍ക്കിങ് സെന്റ് സെബാസ്റ്റിയന്‍സ് യു.പി സ്‌കൂള്‍ ഗ്രൗണ്ടിലാണ് ഉരുക്കിയിരിക്കുന്നത്. കലോത്സവ നടത്തിപ്പിനു മുനിസിപ്പല്‍ കൗണ്‍സിലര്‍മാര്‍ അധ്യക്ഷന്മാരായും അധ്യാപക സംഘടനാ പതിനിധികള്‍ കണ്‍വീനര്‍മാരായുമുള്ള 11 സബ് കമ്മിറ്റികളാണു പ്രവര്‍ത്തിക്കുന്നത്്. കലോത്സവത്തിന്റെ നടത്തിപ്പിനായി ഇക്കുറി ആദ്യമായി 10.45 ലക്ഷം രൂപ സര്‍ക്കാര്‍ അനുവദിച്ചിട്ടുണ്ടെന്നും ഡി.ഡി.ഇ എ അബൂബക്കര്‍ പറഞ്ഞു. വാര്‍ത്താമ്മേളനത്തില്‍ പബ്ലിസിറ്റി കണ്‍വീനര്‍ ബിജോയ് മാത്യു, പ്രോഗ്രാം കമ്മിറ്റി കണ്‍വീനര്‍ വി.എം ഫിലിപ്പച്ചന്‍ എന്നിവരും പങ്കെടുത്തു.