കല്‍പ്പറ്റ: ഏഴുമുതല്‍ പിരപ്പന്‍കോട് അന്താരാഷ്ട്ര സ്വിമ്മിങ് പൂളില്‍ നടക്കുന്ന ഖേലോ-ഇന്ത്യ സംസ്ഥാന നീന്തല്‍ മത്സരങ്ങളില്‍ പങ്കെടുക്കാനുള്ള വയനാട് ജില്ലാ ടീം തെരഞ്ഞെടുപ്പ് നാലിനു നടക്കും. രാവിലെ പത്തുമുതല്‍ നടവയല്‍ ചെല്ലിവില്ല സ്വിമ്മിങ് അക്കാദമിയിലാണു തെരഞ്ഞെടുപ്പ്.
17 വയസിനുതാഴെ പ്രായമുള്ളവര്‍ (1-1-2000 ത്തിനോ അതിനു ശേഷമോ ജനിച്ചവര്‍), 14 വയസിനു താഴെ പ്രായമുള്ളവര്‍ (1-1-2003 നോ അതിനു ശേഷമോ ജനിച്ചവര്‍) എന്നീ രണ്ടു വിഭാഗങ്ങളിലായാണ് ടീം തെരഞ്ഞെടുപ്പ്. 17 വയസിനു താഴെ പ്രായമുള്ളവരുടെ വിഭാഗത്തില്‍ ആണ്‍കുട്ടികള്‍ക്കും പെണ്‍കുട്ടികള്‍ക്കുമായി 50, 100 മീറ്റര്‍ ഫ്രീസ്റ്റൈല്‍, 100 മീറ്റര്‍ ബേക്ക് സ്‌ട്രോക്ക്, 100 മീറ്റര്‍ ബ്രസ്റ്റ് സ്‌ട്രോക്ക്, 100 മീറ്റര്‍ ബട്ടര്‍ഫ്‌ളൈ സ്‌ട്രോക്ക്, 200 മീറ്റര്‍ ഐ.എം, 4:50 മീറ്റര്‍ ഫ്രീസ്റ്റൈല്‍ റിലേ എന്നീ ഇനങ്ങളിലും, 14 വയസിനുതാഴെ പ്രായമുള്ളവരുടെ വിഭാഗത്തില്‍ ആണ്‍കുട്ടികള്‍ക്കും പെണ്‍കുട്ടികള്‍ക്കുമായി 50 മീറ്റര്‍ ഫ്രീസ്റ്റൈല്‍, 50 മീറ്റര്‍ ബേക്ക് സ്‌ട്രോക്ക്, 50 മീറ്റര്‍ ബ്രസ്റ്റ് സ്‌ട്രോക്ക്, 50 മീറ്റര്‍ ബട്ടര്‍ഫ്‌ളൈ സ്‌ട്രോക്ക്, 4:50 മീറ്റര്‍ ഫ്രീസ്റ്റൈല്‍ റിലേ എന്നീ ഇനങ്ങളിലുമാണ് ടീം തെരഞ്ഞെടുപ്പ്.
പങ്കെടുക്കാന്‍ ആഗ്രഹിക്കുന്നവര്‍ ഹെഡ്മാസ്റ്റര്‍, പ്രിന്‍സിപ്പല്‍ സാക്ഷ്യപ്പെടുത്തിയ വയസ്, താമസ സ്ഥലം എന്നിവ തെളിയിക്കുന്ന യോഗ്യതാപത്രം സഹിതം നാലിനു രാവിലെ 10നു മുന്‍പായി നടവയല്‍ ചെല്ലിവില്ല സ്വിമ്മിങ് അക്കാദമിയില്‍ എത്തണമെന്നു ജില്ലാ സ്‌പോര്‍ട്‌സ് കൗണ്‍സില്‍ സെക്രട്ടറി അറിയിച്ചു.