തിരൂരങ്ങാടി: രോഹിത് വെമുലയുടെ സ്മരണാര്‍ഥം ഫീനിക്‌സ് ഫൗണ്ടേഷന്‍ ഏര്‍പ്പെടുത്തിയ മാഗസിന്‍ അവാര്‍ഡിന് പി.എസ്.എം.ഒ കോളജ് യൂനിയന്‍ പുറത്തിറക്കിയ 'അസര്‍മുല്ലയും തൊട്ടങ്ങയും പൂമ്പാറ്റയും പൂത്താങ്കീരിയും ഹാജര്‍ പറയുന്നു' എന്ന മാഗസിന്‍ അര്‍ഹമായി. 5001 രൂപയും ഉപഹാരവുമടങ്ങുന്നതാണ് അവാര്‍ഡ്. ഷമീം താണിവളപ്പിലാണ് അവാര്‍ഡിനര്‍ഹമായ മാഗസിന്റെ പത്രാധിപര്‍.
2016 ല്‍ ക്യാംപസുകളില്‍ ഇറങ്ങിയ മാഗസിനുകളില്‍ നിന്നും പി സുരേന്ദ്രന്‍ ചെയര്‍മാനായ ജൂറി പാനലാണ് അവാര്‍ഡിനര്‍ഹമായതിനെ തെരഞ്ഞെടുത്തത്. ഏഴിന് രാവിലെ ഒന്‍പതിന് കോട്ടക്കല്‍ രാജാസ് ഹയര്‍ സെക്കന്‍ഡറി സ്‌കൂള്‍ അങ്കണത്തില്‍ നടക്കുന്ന മാഗസിന്‍ എഡിറ്റര്‍മാര്‍ക്കുള്ള ശില്‍പശാലയില്‍ അവാര്‍ഡ് വിതരണം ചെയ്യും. വി.ടി ബല്‍റാം എം.എല്‍.എ, കോളമിസ്റ്റ് അഡ്വ. കെ.എന്‍.എ ഖാദര്‍, പി സുരേന്ദ്രന്‍, കെ വേണു, കഥാകൃത്തും ചിത്രകാരനുമായ മുഖ്താര്‍ ഉദരംപൊയില്‍, ചിത്രകാരി ദുര്‍ഗ മാലതി, പ്രൊഫ. ശരീഫ് ചെമ്മാട് തുടങ്ങിയവര്‍ ചടങ്ങില്‍ പങ്കെടുക്കുമെന്ന് ഫീനിക്‌സ് ഫൗണ്ടേഷന്‍ പ്രസിഡന്റ് എന്‍.കെ അഫ്‌സല്‍ റഹ്മാന്‍, ജനറല്‍ സെക്രട്ടറി കെ.എം ഷാഫി, ട്രഷറര്‍ കുരിക്കള്‍ മുനീര്‍ എന്നിവര്‍ വാര്‍ത്താകുറിപ്പില്‍ അറിയിച്ചു. ശില്‍പശാലയില്‍ പങ്കെടുക്കാന്‍ വിളിക്കുക. 9847603131.