കണ്ണൂര്‍: പൊലിസില്‍ രാഷ്ട്രീയ ഇടപെടല്‍ സ്വാഭാവികമാണെന്ന് സ്ഥാനമൊഴിഞ്ഞ എസ്.പി കോറി സഞ്ജയ് കുമാര്‍ ഗുരുദിന്‍. മാധ്യമ പ്രവര്‍ത്തകരുമായി സംസാരിക്കുകയായിരുന്നു അദ്ദേഹം. രാഷ്ട്രീയ സമ്മര്‍ദം നേരിട്ട് അനുഭവപ്പെട്ടിട്ടില്ല. എന്തെങ്കിലും ചെയ്തു തരണമെന്ന് ആരും വന്നു പറഞ്ഞിട്ടില്ല. കേരളത്തിലെ മറ്റു ജില്ലകളെ അപേക്ഷിച്ച് കണ്ണൂരില്‍ രാഷ്ട്രീയ പ്രവര്‍ത്തനം കൂടുതലാണ്. ഇതു പൊലിസിലും പ്രതിഫലിക്കും. തലശേരി ഫസല്‍ വധക്കേസില്‍ പൊലിസ് കണ്ടെത്തിയ പുതിയ വിവരങ്ങള്‍ നിലവില്‍ കേസന്വേഷണം നടത്തുന്ന സി.ബി.ഐയെ അറിയിച്ചിട്ടുണ്ട്. കേസില്‍ തുടരന്വേഷണം നടത്തേണ്ടത് സി.ബി.ഐയാണ്. രാഷ്ട്രീയ കൊലപാതക കേസുകള്‍ കണ്ണൂരില്‍ കൂടുതലാണ്. കുറച്ചു മാസമായി കണ്ണൂര്‍ ശാന്തമാണെന്ന അനുഭവത്തോടെയാണ് ചുമതലയൊഴിയുന്നതെന്നും സഞ്ജയ് കുമാര്‍ പറഞ്ഞു.