കോട്ടയം: കൈപ്പുഴ മാക്കോത്തറ പാടശേഖരത്തില്‍ നെല്ല് മഞ്ഞപ്പ് ബാധിച്ചു പഴുത്തുണങ്ങുന്നു. 500 ഏക്കറോളം വരുന്ന പാടശേഖരത്തില്‍ നിരവധി കര്‍ഷകരുടെ കൃഷിയിടത്തില്‍ നെല്‍ചെടികളില്‍ മഞ്ഞപ്പ് ബാധിച്ച് പഴുത്തിരിക്കുകയാണ്. ഇതേതുടര്‍ന്നു പുഞ്ചകൃഷിയിറക്കിയ കര്‍ഷകര്‍ ആശങ്കയിലാണ്.
ആദ്യം നെല്ലോലകളില്‍ മഞ്ഞപ്പു ബാധിക്കും. പിന്നീട് പഴുത്ത് ഉണങ്ങുന്ന രീതിയാണു കണ്ടുവരുന്നത്. കൈപ്പുഴ അറയ്ക്കല്‍ ബാബു, ആര്‍പ്പുക്കര സ്വദേശി ജിമ്മി, കൈപ്പുഴ സ്വദേശികളായ കൊല്ലിയില്‍ സാബു, രാജീവ് തുടങ്ങി നിരവധി പേരുടെ പാടശേഖരങ്ങളില്‍ നെല്‍ചെടികളില്‍ മഞ്ഞപ്പ് ബാധിച്ചിട്ടുണ്ട്. 70 മുതല്‍ 75 ദിവസം വരെ പ്രായമായ നെല്‍ചെടികളില്‍ കതിരിട്ടു തുടങ്ങിയിട്ടുണ്ട്. എന്നാല്‍, രോഗബാധ കതിര്‍ നന്നായി വളരുന്നതിനു ദോഷകരമാകുമോയെന്ന ആശങ്കയിലാണു കര്‍ഷകര്‍.
വെള്ളത്തിലെ പുളിയാണു രോഗബാധയ്ക്കു കാരണമെന്നു ചിലര്‍ പറയുന്നു. പല കര്‍ഷകരും മഞ്ഞപ്പ് മാറ്റുന്നതിനായ് മരുന്നു തളിക്കുന്നുണ്ട്. രോഗബാധയെ പ്രതിരോധിക്കുന്നതിനു കൃഷി ഓഫിസില്‍നിന്നു വേണ്ടത്ര നടപടിയുണ്ടാകുന്നില്ലെന്നു കര്‍ഷകര്‍ ചൂണ്ടിക്കാട്ടുന്നു.
500 ഏക്കറോളം വരുന്ന മാക്കോത്തറ പാടശേഖരത്ത് 30 ഏക്കറില്‍ തളിക്കുന്നതിനുള്ള മരുന്നുമാത്രമാണ് കൃഷി ഓഫിസില്‍നിന്നു നല്‍കിയതെന്നു കര്‍ഷകര്‍ പറയുന്നു. പലരും മരുന്നിനായി കൃഷി ഓഫിസില്‍ സമീപിച്ചെങ്കിലും മരുന്ന് ലഭിക്കാതെ മടങ്ങുകയായിരുന്നു. തുടര്‍ന്ന്, കര്‍ഷകര്‍ സ്വന്തം നിലയില്‍ മരുന്ന് വാങ്ങിയാണു നെല്‍ചെടികളില്‍ തളിച്ചത്.
അടുത്ത കൃഷിക്കു മുന്‍പായി പൊടി ഉഴുന്ന സമയത്ത് കക്കായിടുകയും പിന്നീട് വെള്ളം കയറ്റുകയും ചെയ്യുമ്പോള്‍ പാടത്തെ പുളിക്കു ശമനമുണ്ടാകുമെന്നു കര്‍ഷകര്‍ പറയുന്നു. ഇതിനായി കൃഷി ഓഫിസില്‍നിന്ന് കക്കാ സബ്ഡിയായി നല്‍കണമെന്നും കര്‍ഷകര്‍ ആവശ്യപ്പെടുന്നുണ്ട്. പ്രദേശത്തെ മറ്റു പാടങ്ങളില്‍ പട്ടാളപ്പുഴുവിന്റെ ആക്രമണവുമുണ്ട്. പായ്‌വട്ടം കറുകപ്പാടത്ത് പട്ടാളപ്പുഴുവിന്റെ ആക്രമണത്തില്‍നിന്നു നെല്‍ചെടികളെ സംരക്ഷിക്കാന്‍ മരുന്നടിച്ചു തുടങ്ങിയിരിക്കുകയാണ്. മറ്റു പാടങ്ങളിലെ കര്‍ഷകരും പട്ടാളപ്പുഴുവിന്റെ ആക്രമണം പേടിച്ചാണു കഴിയുന്നത്.