ബ്രിസ്‌ബേന്‍: ഏകദിന പരമ്പരയിലെ ആദ്യ മത്സരത്തിലും പാകിസ്താനെ ആസ്‌ത്രേലിയ വീഴ്ത്തി. 92 റണ്‍സിനാണ് കങ്കാരുക്കള്‍ ജയം സ്വന്തമാക്കിയത്. ആസ്‌ത്രേലിയയുടെ 269 റണ്‍സ് വിജയലക്ഷ്യവുമായി ബാറ്റിങിനിറങ്ങിയ പാകിസ്താന്‍ 176 റണ്‍സിന് കൂടാരം കയറി.
പാക് നിരയില്‍ ഒരാള്‍ക്ക് പോലും അര്‍ധസെഞ്ച്വറി നേടാന്‍ സാധിച്ചില്ല. ബാബര്‍ അസം(33) ആണ് ടോപ് സ്‌കോറര്‍. അസ്ഹര്‍ അലി(24) മുഹമ്മദ് റിസ്‌വാന്‍(21) ഇമാദ് വാസിം(29) എന്നിവര്‍ക്ക് മികച്ച തുടക്കം ലഭിച്ചെങ്കിലും മുതലാക്കാന്‍ സാധിച്ചില്ല.  
ഓസീസിന് വേണ്ടി ജെയിംസ് ഫോക്‌നര്‍ നാലു വിക്കറ്റെടുത്തു. കമ്മിന്‍സ് മൂന്നും മിച്ചല്‍ സ്റ്റാര്‍ക് രണ്ടും വിക്കറ്റ് സ്വന്തമാക്കി.
നേരത്തെ ടോസ് നേടിയ ആസ്‌ത്രേലിയ ബാറ്റിങ് തെരഞ്ഞെടുക്കുകയായിരുന്നു. എന്നാല്‍ അപ്രതീക്ഷിതമായി ടീം തകര്‍ന്നു. അഞ്ചിന് 78 എന്ന നിലയിലേക്കാണ് ടീം വീണത്. ഡേവിഡ് വാര്‍ണര്‍(7) ട്രാവിസ് ഹെഡ്(39) സ്റ്റീവന്‍ സ്മിത്ത്(0) ക്രിസ് ലിന്‍(16) മിച്ചല്‍ മാര്‍ഷ്(4) എന്നിവര്‍ നിരാശപ്പെടുത്തി.
എന്നാല്‍ ആറാം വിക്കറ്റില്‍ ഒത്തു ചേര്‍ന്ന മാത്യു വേഡ്(100) ഗ്ലെന്‍ മാക്‌സ്‌വെല്‍(60) ഓസീസിനെ തിരിച്ചു കൊണ്ടു വന്നു. 82 റണ്‍സിന്റെ കൂട്ടുകെട്ടാണ് ഇവര്‍ ഉണ്ടാക്കിയത്. വേഡ് 100 പന്തില്‍ ഏഴു ബൗണ്ടറിയും രണ്ടു സിക്‌സറും പറത്തിയാണ് സെഞ്ച്വറി തികച്ചത്. മാക്‌സ്‌വെല്ലിന്റെ ഇന്നിങ്‌സില്‍ ഏഴു ബൗണ്ടറിയുണ്ടായിരുന്നു.