തലശ്ശേരി: ആര്‍.എസ്.എസ് നേതാവ് കതിരൂര്‍ മനോജ് വധക്കേസില്‍ പ്രതികളായി റിമാന്‍ഡില്‍ കഴിയുന്ന 15 സി.പി.എം പ്രവര്‍ത്തകരുടെ ജാമ്യഹരജിയില്‍ തലശ്ശേരി ജില്ലാ പ്രിന്‍സിപ്പല്‍ സെഷന്‍സ് കോടതിയില്‍ വാദം പൂര്‍ത്തിയായി. ഇരുഭാഗത്തിന്റെയും വിശദമായ വാദം കേട്ടശേഷം ഹരജിയില്‍ വിധി പ്രഖ്യാപിക്കാനായി ജഡ്ജി വി. ജയറാം കേസ് ഈ മാസം 19 ലേക്ക് മാറ്റി.
കേസിലെ കിഴക്കെ കതിരൂരിലെ കാട്ടില്‍ മീത്തല്‍ വീട്ടില്‍ വിക്രമന്‍ (44), കുനിയില്‍ വീട്ടില്‍ ജിജേഷ് (35), മാലൂര്‍ കുന്നുമ്മല്‍ വീട്ടില്‍ ലുധിയ നിവാസില്‍ ടി. പ്രഭാകരന്‍ (41), കതിരൂര്‍ വേറ്റുമ്മലിലെ ഒതയോത്ത് വീട്ടില്‍ ഷിബിന്‍ (37), കോട്ടയംപൊയില്‍ സ്വദേശി ചൂളാവില്‍ വീട്ടില്‍ പി. സുജിത്ത് (32), കതിരൂര്‍ നന്ദ്യത്ത് വീട്ടില്‍ വിനോദ് (36), മാലൂര്‍ കാവിന്‍മൂല സ്വദേശി മീത്തല തച്ചറത്ത് റിജു (29), മാലൂര്‍ തോലമ്പ്രയിലെ സിനില്‍ നിവാസില്‍ സിനില്‍ (36), മാലൂര്‍ കാവിന്‍മൂലയിലെ മീത്തലെ തച്ചറോത്ത് ബിജു എന്ന പൂവാടന്‍ വിജേഷ് (36) തുടങ്ങി റിമാന്‍ഡില്‍ കഴിയുന്ന 15 പ്രതികളുടെ ജാമ്യഹരജിയിലാണ് ഇന്നലെ കോടതി വാദംകേട്ടത്.