പെരിന്തല്‍മണ്ണ: മുംബൈ കൊളാബാ കൂപ്പറേജ് ഗ്രൗണ്ടില്‍ നടന്ന റിലയന്‍സ് ഫൗണ്ടേഷന്‍ യൂത്ത് സ്‌പോര്‍ട്‌സ് ഫുട്‌ബോള്‍ ചാംപ്യന്‍ഷിപ്പില്‍ മികച്ച ഗോള്‍ കീപ്പര്‍ക്കുള്ള ഗോള്‍ഡന്‍ ഗ്ലൗ നേടിയ മൂവാറ്റുപുഴ നിര്‍മല കോളജിന്റെ ഗോള്‍കീപ്പറും പെരിന്തല്‍മണ്ണ പാറല്‍ സ്വദേശിയുമായ വി. അബ്ദുല്‍ സലീമിന് ജന്മനാട്ടില്‍ പൗരാവലി സ്വീകരണമൊരുക്കി. പെരിന്തല്‍മണ്ണ ടൗണില്‍നിന്നു നൂറുകണക്കിന് വാഹനങ്ങളുടെ അകമ്പടിയോടെയായിരുന്നു സ്വീകരണം. തുടര്‍ന്ന് ആനമങ്ങാട്, പാറല്‍, തൂത എന്നിവിടങ്ങളില്‍ സ്വീകരണം നല്‍കി. വിവിധ രാഷ്ട്രീയ പാര്‍ട്ടികളും ക്ലബുകളും സന്നദ്ധ സംഘടനകളും ഉപഹാരങ്ങള്‍ സമ്മാനിച്ചു. റിലയന്‍സ് ഫൗണ്ടേഷന്‍ യൂത്ത് സ്‌പോര്‍ട്‌സ് ഫുട്‌ബോള്‍ ചാംപ്യന്‍ഷിപ്പില്‍ കോളജ് ബോയ്‌സ് വിഭാഗത്തില്‍ രണ്ടാംസ്ഥാനക്കാരായ മൂവാറ്റുപുഴ നിര്‍മല കോളജിനായി മലപ്പുറത്തിന്റെ ഏഴു താരങ്ങളാണ് ബൂട്ടണിഞ്ഞത്. പാറല്‍ വാണില്‍ മുഹമ്മദ് അലിയുടെ മകനാണ് സാലിം.