ന്യൂഡല്‍ഹി: സൈന്യത്തില്‍ മോശം ഭക്ഷണമാണ് ലഭിക്കുന്നതെന്ന ബി.എസ്.എഫ് ജവാന്റെ പരാതി സി.ബി.ഐ അന്വേഷിക്കണമെന്നാവശ്യപ്പെട്ട് തേജ് ബഹാദൂറിന്റെ ബന്ധുക്കള്‍ രംഗത്ത്. കഴിഞ്ഞ ദിവസം സൈനികന് പിന്തുണയുമായി കുടുംബം നിലപാടറിയിച്ചതിന് പിന്നാലെയാണ് സി.ബി.ഐ അന്വേഷണമാവശ്യപ്പെട്ട് ഭാര്യ ഷര്‍മിള രംഗത്തെത്തിയത്.

സൈനികന്‍ ഉന്നയിച്ച പരാതികള്‍ ബി.എസ്.എഫ് അന്വേഷിച്ചാല്‍ പോര. അവര്‍ തന്നെ അന്വേഷിച്ചാല്‍ അവരുടെ ഉദ്യോഗസ്ഥരെ രക്ഷിക്കാനേ ശ്രമിക്കൂ. അതുകൊണ്ടാണ് നിഷ്പക്ഷമായ അന്വേഷണത്തിനായി സംഭവം സി.ബി.ഐ അന്വേഷിക്കണമെന്നാവശ്യപ്പെടുന്നതെന്നും ഷര്‍മിള പറഞ്ഞു.

കഴിഞ്ഞ രണ്ടു ദിവസമായി ബഹാദൂറിനെക്കുറിച്ച് യാതൊരു വിവരവുമില്ലെന്നും. അദ്ദേഹവുമായി ബന്ധപ്പെടാന്‍ സാധിക്കുന്നില്ലെന്നും അവര്‍ പറഞ്ഞു. അദ്ദേഹത്തിന് മാധ്യമങ്ങളുമായി ബന്ധപ്പെടാനുള്ള അവസരം ബി.എസ്.എഫ് ഒരുക്കിക്കൊടുക്കണമെന്നും അതോടെ അദ്ദേഹത്തിന് പറയാനുള്ളത് എന്താണെന്ന് ജനങ്ങള്‍ക്ക് മനസ്സിലാകുമെന്നും അവര്‍ പറഞ്ഞു.

ബി.എസ്.എഫിനു നല്‍കുന്ന ഭക്ഷണം മോശമാണെന്നറിയിച്ച് ബഹാദൂര്‍ സോഷ്യല്‍ മീഡിയയില്‍ പോസ്റ്റ് ചെയ്ത വീഡിയോ ഏറെ ചര്‍ച്ച ചെയ്തിരുന്നു. ഇതിനു ശേഷം മറ്റു രണ്ടു സൈനികരും സൈന്യത്തിലെ പ്രശ്‌നങ്ങളുന്നയിച്ച് സോഷ്യല്‍ മീഡിയയിലൂടെ രംഗത്തു വന്നിരുന്നു. ഇതിനെക്കുറിച്ച് പ്രധാനമന്ത്രിയുടെ ഓഫിസ് റിപ്പോര്‍ട്ട് ആവശ്യപ്പെടുകയും ചെയ്തിട്ടുണ്ട്.