കൊച്ചി: മുന്‍ കേരള  താരങ്ങളായ അജയ് കുടുവയും ജി ജയകുമാറും കേരള ക്രിക്കറ്റ് ടീം സഹ പരിശീലകരാകും. കേരളത്തിന്റെ ടി20, ഏകദിന ടീമുകളുടെ ബാറ്റിങ്, ബൗളിങ് പരിശീലകരായാണു ഇരുവരേയും നിയമിച്ചത്.
നിലവിലെ കോച്ച് ടിനു യോഹന്നാനൊപ്പമായിരിക്കും ഇരുവരും കളിക്കാരെ പരിശീലിപ്പിക്കുക. അജയ് കുടുവ ബാറ്റിങിലും ജയകുമാര്‍ ബൗളിങിലും പരിശീലനം നല്‍കും. ചെന്നൈയിലായിരിക്കും കേരളത്തിന്റെ പരിശീലന ക്യാംപ്.
 കേരള ക്രിക്കറ്റ് അസോസിയേഷനാണ് ഇരുവരെയും നിയോഗിച്ചത്. അജയ് കുടുവയുടെയും ജയകുമാറിന്റെയും അനുഭവ സമ്പത്ത് ടീമിനു ഗുണകരമാകുമെന്നു കെ.സി.എ സെക്രട്ടറി ജയേഷ് ജോര്‍ജ്ജ് പറഞ്ഞു.