ബെയ്ജിങ്: പാക് തുറമുഖ സുരക്ഷ ഉറപ്പാക്കാന്‍ ചൈന രണ്ടു കപ്പലുകള്‍ പാക് നേവിക്ക് നല്‍കി. തന്ത്രപ്രധാനമായ ഗ്വാദര്‍ തുറമുഖത്തിന്റെയും വ്യാപാരപാതയുടെയും സുരക്ഷ ഉറപ്പാക്കാനാണ് ചൈന കപ്പലുകള്‍ കൈമാറിയിരിക്കുന്നത്. 4,600 കോടി ഡോളറിന്റെ ചൈന-പാക് സാമ്പത്തിക ഇടനാഴി പദ്ധതിക്ക് വേണ്ടത്ര സംരക്ഷണം ഉറപ്പാക്കുകയാണ് ഇതിലൂടെ ചൈന ലക്ഷ്യമിടുന്നത്.
ശനിയാഴ്ചയാണ് കപ്പലുകള്‍ കൈമാറിയതെന്ന് പാക് മാധ്യമങ്ങള്‍ റിപ്പോര്‍ട്ട് ചെയ്തു. ബലൂചിസ്ഥാന്‍ പ്രവിശ്യയുടെ വികനത്തോടൊപ്പം പാകിസ്താനിലൂടെ ചൈനീസ് ഉല്‍പന്നങ്ങള്‍ മധ്യപൗരസ്ത്യ ദേശം, ആഫ്രിക്ക, യൂറോപ്പ് എന്നിവിടങ്ങളിലേക്ക് എളുപ്പത്തില്‍ എത്തിക്കാനും ഇതുവഴി സാധിക്കും. ഇന്ത്യ കടുത്ത ആശങ്കയോടെയാണ് ചൈനീസ് നീക്കത്തെ കാണുന്നത്. മേഖലയിലെ ചൈനീസ് സ്വാധീനം രാജ്യസുരക്ഷ ഉള്‍പ്പെടെയുള്ളവയെ അപകടത്തിലാക്കുമെന്നും ഇന്ത്യക്ക് ഭയമുണ്ട്.