കൊണ്ടോട്ടി: മിക്‌സിക്കുള്ളിലെ മോട്ടോറിനകത്ത് ഉരുക്കിയൊഴിച്ച് കടത്തിയ 2.759 കിലോ സ്വര്‍ണം പിടികൂടി. ഇന്നലെ രാവിലെ എയര്‍ഇന്ത്യ എക്‌സ്പ്രസിന്റെ ദുബൈ വിമാനത്തിലെത്തിയ കോഴിക്കോട് നരിക്കുനി നടുക്കണ്ടി റിയാസി(25)ല്‍ നിന്നാണ് 81.55 ലക്ഷം വില വരുന്ന സ്വര്‍ണം കണ്ടെത്തിയത്.
രഹസ്യവിവരത്തെ തുടര്‍ന്നാണ് ഡി.ആര്‍.ഐ സംഘം റിയാസിനെ പിടികൂടിയത്. മിക്‌സിയുടെ മോട്ടോറിനകത്ത് സ്വര്‍ണക്കട്ടികള്‍ പ്രത്യേകം ഉരുക്കി ഒഴിച്ച നിലയിലായിരുന്നു. സ്വര്‍ണം ഇതിനനുസരിച്ച് പ്രത്യേക ആകൃതിയിലായിരുന്നു. സാധാരണ പരിശോധനയില്‍ കാണാന്‍ കഴിയാത്ത വിധമായിരുന്നു കള്ളക്കടത്ത്. ഇയാള്‍ സ്വര്‍ണക്കടത്ത് കരിയറാണെന്ന് ഡി.ആര്‍.ഐ ഉദ്യോഗസ്ഥര്‍ പറഞ്ഞു. വിസിറ്റിംഗ് വിസയില്‍ ദുബൈയിലെത്തിയ ഇയാള്‍ 50,000 രൂപക്കാണ് സ്വര്‍ണം കടത്തിയത്.