മേപ്പാടി: കാവുമന്ദത്ത് അങ്കണവാടി തകര്‍ന്ന് വീണതിന് പിന്നാലെ തകര്‍ച്ചയുടെ വക്കില്‍ മറ്റൊരു അങ്കണവാടി കൂടി. അമ്പലവയല്‍ പഞ്ചായത്തിലെ പുറ്റാട് അങ്കണവാടിയാണ് തകര്‍ന്ന് വീഴാറായ വാടക കെട്ടിടത്തില്‍ പ്രവര്‍ത്തിക്കുന്നത്.
ചുമരുകള്‍ ദ്രവിച്ച് വിള്ളല്‍ വീണിട്ടുണ്ട്. മേല്‍ക്കൂരയിലെ ഓടുകള്‍ പൊട്ടിയതിനാല്‍ പ്ലാസ്റ്റിക് ഷീറ്റ് വലിച്ച് കെട്ടിയിരിക്കുകയാണ്. താല്‍ക്കാലികമായി ഒരു വര്‍ഷത്തേക്ക് വാടകക്കായി പ്രവര്‍ത്തനം ആരംഭിച്ച അങ്കണവാടി പത്ത് വര്‍ഷം കഴിഞ്ഞിട്ടും മറ്റൊരു കെട്ടിടത്തിലേക്ക് മാറ്റാന്‍ കഴിഞ്ഞിട്ടില്ല. ഒരു വര്‍ഷം മുന്‍പാണ് ജില്ലാ കലക്ടര്‍ കേശവേന്ദ്ര കുമാര്‍ അങ്കണവാടി സന്ദര്‍ശിച്ചത്. രണ്ട് മാസത്തിനകം അങ്കണവാടിക്ക് കെട്ടിടം നിര്‍മിക്കണമെന്ന് നിര്‍ദേശം നല്‍കിയതാണ്.
ഏഴ് സെന്റ് റവന്യു ഭൂമി അനുവദിച്ചു. എന്നാല്‍ ഒരു വര്‍ഷം കഴിഞ്ഞിട്ടും കെട്ടിട നിര്‍മാണം ആരംഭിച്ചിട്ടില്ല. കാവുമന്ദത്തെ അങ്കണവാടി തകര്‍ന്ന വിവരം പുറത്ത് വന്നതോടെ കുട്ടികളെ അങ്കണവാടിയില്‍ നിന്നും വീട്ടിലേക്ക് കൊണ്ട് പോയി. ഇന്നലെ ആകെ രണ്ട് കുട്ടികള്‍ മാത്രമെ അങ്കണവാടിയിലെത്തിയിരുന്നുള്ളൂ.