തിരുവനന്തപുരം: സെക്രട്ടേറിയറ്റിലെ മുങ്ങല്‍ വിദഗ്ധരെ പിടിക്കാന്‍ പഞ്ചിങ് സംവിധാനം നിലവില്‍ വന്നു. സമയത്തും കാലത്തും സീറ്റില്‍ ഇല്ലാത്തവരുടെ ശമ്പളം പിടിക്കും.രാവിലെ എത്തിയ സര്‍ക്കാര്‍ ജീവനക്കാരെല്ലാം പഞ്ച് ചെയ്ത ശേഷമാണ് ജോലിയില്‍ പ്രവേശിച്ചത്.

പഞ്ചിങിനൊപ്പം എല്ലാ ജീവനക്കാരും തിരച്ചറിയല്‍ കാര്‍ഡ് ധരിക്കണമെന്നും നേരത്തെ ഉത്തരവിറക്കിയിരുന്നു.

ശമ്പള വിതരണ സോഫ്റ്റ്‌വെയറായ സ്പാര്‍ക്കുമായി പഞ്ചിങിനെ ബന്ധിപ്പിക്കും. ജീവനക്കാര്‍ ഓഫിസിലെത്തി പഞ്ച് ചെയ്തു കഴിഞ്ഞാല്‍ പിന്നെ മുങ്ങുന്നതായി നേരത്തെ പരാതി ഉയര്‍ന്നിരുന്നു.

നിലവില്‍ പഞ്ചിങ് രേഖപ്പെടുത്തിയ ശേഷം ഹാജര്‍ റജിസ്റ്ററിലും ഒപ്പിടുന്നുണ്ട്. ഈ ഹാജര്‍ ബുക്കിന്റെ അടിസ്ഥാനത്തിലാണ് അവധി നിര്‍ണയിക്കുക. മേലുദ്യോഗസ്ഥന്റെ കാരുണ്യമുണ്ടെങ്കില്‍ ഒപ്പിടലില്‍ ഇളവും ലഭിക്കും. എന്നാല്‍, സ്പാര്‍ക്കുമായി ബന്ധിപ്പിച്ചുള്ള ബയോമെട്രിക് പഞ്ചിങ് വന്നതോടെ ഈ കള്ളക്കളി നടക്കില്ല.

മൂന്നുദിവസം തുടര്‍ച്ചയായി ഒരു മണിക്കൂര്‍ വൈകിയെത്തുകയോ, നേരത്തെ പോകുകയോ ചെയ്താല്‍ ഒരു ദിവസത്തെ അവധിയായി രേഖപ്പെടുത്തും. മറ്റ് ഓഫിസുകളില്‍ ഔദ്യോഗിക ആവശ്യങ്ങള്‍ക്കു പോകുന്ന ജീവനക്കാര്‍ അവിടെ പഞ്ച് ചെയ്താല്‍ മതി.