ദേശമംഗലം: അഞ്ച് പഞ്ചായത്തുകളിലെ ജനങ്ങള്‍ക്ക് ശുദ്ധ ജലമെത്തിക്കുന്ന ഭീമന്‍ വാട്ടര്‍ ടാങ്കിന് മൂടി പോലുമില്ലാത്തത് മൂലം നൂറ് കണക്കിന് ജനങ്ങള്‍ രൂക്ഷമായ വേനലില്‍ മലിന ജലം കുടിക്കേണ്ട അവസ്ഥയില്‍. കടങ്ങോട് ശുദ്ധ ജല പദ്ധതിയുടെ ഗുണഭോക്താക്കളായ വരവൂര്‍, എരുമപ്പെട്ടി കടങ്ങോട്, ദേശമംഗലം പഞ്ചായത്തുകളിലെ ജനങ്ങളാണ് മലിനജലം കുടിച്ച് വിവിധ മാരക രോഗങ്ങള്‍ക്ക് കീഴടങ്ങുന്നത്.
ഈ കുടിവെള്ള പദ്ധതിയുടെ ഭാഗമായി വിതരണം ചെയ്യുന്ന വെള്ളം മുഴുവന്‍ മലിനമാണെന്നും രൂക്ഷമായ ദുര്‍ഗന്ധം മൂലം ഉപയോഗിക്കാന്‍ കഴിയാത്ത അവസ്ഥയാണെന്നും നേരത്തെ നാട്ടുകാര്‍ ആരോപിച്ചിരുന്നു. വെള്ളത്തില്‍ നിറയെ മാലിന്യങ്ങളും, പാറ്റ ചിറകുകളുമൊക്കെ കണ്ടെത്തിയതിനെ തുടര്‍ന്ന് ജനങ്ങള്‍ പഞ്ചായത്തിനും വാട്ടര്‍ അതോരിറ്റിക്കും നിവേദനം നല്‍കുകയും ചെയ്തു. എന്നിട്ടും അധികൃതര്‍ അനങ്ങാപാറ നയം സ്വീകരിച്ചതിനെ തുടര്‍ന്ന് നാട്ടുകാര്‍ കുടിവെള്ള പദ്ധതിയുടെ ടാങ്ക് അന്വേഷിച്ചിറങ്ങിയപ്പോഴാണ് ഞെട്ടിക്കുന്ന വിവരങ്ങള്‍ പുറം ലോകം അറിയുന്നത്.
കൊണ്ടയൂര്‍ കുടപ്പാറയിലെ വനത്തിനുള്ളിലെ വാട്ടര്‍ ടാങ്കിനടുത്ത് എത്തിപ്പെടുക എന്നത് തന്നെ ഏറെ ദുഷ്‌കരമാണെന്ന് നാട്ടുകാരനായ ബാബു കാങ്കലാത്ത് പറയുന്നു. കാട്ടുപൊന്തകളാല്‍ ചുറ്റപ്പെട്ട് കിടക്കുന്നതിനാല്‍ 5 ലക്ഷം ലിറ്റര്‍ സംഭരണ ശേഷിയുള്ള വാട്ടര്‍ ടാങ്ക് പുറത്തേക്ക് കാണാന്‍ പോലും കഴിയാത്ത സ്ഥിതിയാണ്. മൂടി ഇല്ലാത്തതിനാല്‍ ചുറ്റുമുള്ള മരങ്ങളുടെ ഇല മുഴുവന്‍ ടാങ്കിലേക്ക് വീഴുന്ന സ്ഥിതിയാണ്.
ഈ ഇലകള്‍ ചീഞ്ഞ് നാറിയാണ് വെള്ളത്തിന് ദുര്‍ഗന്ധം ഉണ്ടാകുന്നതെന്നും കണ്ടെത്തി. ഇഴ ജന്തുക്കളും മറ്റും ടാങ്കില്‍ വീണ് ചത്ത് കിടക്കുന്നതായും കണ്ടെത്തി. വര്‍ഷങ്ങളായി അറ്റകുറ്റപണികള്‍ നടത്താത്ത ടാങ്കില്‍ ശുചീകരണ പ്രവര്‍ത്തനങ്ങളൊന്നും നടന്നിട്ടില്ലെന്ന് നാട്ടുകാര്‍ ആരോപിക്കുന്നു.
ജനങ്ങള്‍ക്ക് ഗുരുതരമായ ആരോഗ്യ പ്രശ്‌നങ്ങള്‍ ഉണ്ടാകാന്‍ സാധ്യതയുള്ളതിനാല്‍ അധികൃതരുടെ ഭാഗത്ത് നിന്ന് അടിയന്തര നടപടി ഉണ്ടാകണമെന്ന് റിട്ടയേര്‍ഡ് തഹസില്‍ദാര്‍ എം.കെ സോമനാഥനും ആവശ്യപ്പെട്ടു.
ജനങ്ങളുടെ ആരോഗ്യം തകര്‍ത്ത് അവരെ മാരക രോഗത്തിലേക്ക് തള്ളിവിടുന്ന വാട്ടര്‍ അതോരിറ്റിക്കെതിരെ പ്രക്ഷോഭത്തിനൊരുങ്ങുകയാണ് നാട്ടുകാര്‍.