കുമളി: നിയമവാഴ്ച കൈയ്യിലെടുത്ത് പൊലിസിനു നേരെ സി.പി.എം അക്രമം അഴിച്ചുവിട്ടിട്ടും ഇത് കണ്ടില്ലെന്ന് നടിക്കുകയാണ് അഭ്യന്തര വകുപ്പെന്ന് യൂത്ത് കോണ്‍സ് സംസ്ഥാന പ്രസിഡന്റ് അഡ്വ. ഡീന്‍ കുര്യാക്കോസ്.
ഗതാഗതക്കുരുക്കുണ്ടാക്കിയ ലോക്കല്‍ സെക്രട്ടറിയുടെ കാര്‍ മാറ്റിയിട്ടതിന്റെ പേരില്‍ പൊലിസ് ഉദ്യോഗസ്ഥനെ മര്‍ദിച്ച സി പി എമ്മുകാരെ അറസ്റ്റ് ചെയ്യണമെന്നാവശ്യപ്പെട്ട് യൂത്ത് കോണ്‍ഗ്രസ് നടത്തിയ കുമളി സി.ഐ ഓഫീസ് മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സി.പി.എമ്മുകാരുടെ അക്രമത്തെ തുടര്‍ന്ന് പൊലിസ് ഉദ്യോഗസ്ഥര്‍ക്ക് പോലും കേരളത്തില്‍ ജീവിക്കാന്‍ കഴിയാത്ത അവസ്ഥയാണെന്നും സഹപ്രവര്‍ത്തകനായ പൊലിസ് ഉദ്യോഗസ്ഥനെ മര്‍ദിച്ച സി.പി.എമ്മുകാരെ അറസ്റ്റ് ചെയ്യാന്‍ കഴിയാത്ത കുമളി സി.ഐ, ഓഫീസ് പൂട്ടി താക്കോല്‍ സി പി എം ജില്ലാ കമ്മറ്റി ഓഫീസില്‍ നല്‍കുകയാണ് വേണ്ടതെന്നും ഡീന്‍ കുര്യാക്കോസ് പരിഹസിച്ചു.
യൂത്ത് കോണ്‍ഗ്രസ് മണ്ഡലം പ്രസിഡന്റ് സനൂപ് പുതുപ്പറമ്പില്‍ അധ്യക്ഷത വഹിച്ചു, കോണ്‍ഗ്രസ് ബ്ലോക്ക് പ്രസിഡന്റ് എം.എം വര്‍ഗീസ്, യൂത്ത് കോണ്‍ഗ്രസ് പാര്‍ലമെന്റ് കമ്മറ്റി പ്രസിഡന്റ് ബിജോ മാണി, ഡി.സി.സി സെക്രട്ടറിമാരായ ഷാജി പൈനാടത്ത്, സി.എന്‍ വിജയന്‍, എ. റഷിദ് തുടങ്ങിയവര്‍ സംസാരിച്ചു.