ശ്രീനഗര്‍: കശ്മിരില്‍ മഞ്ഞുമലയിടിഞ്ഞ് സൈനിക ഉദ്യോഗസ്ഥന്‍ അടക്കം അഞ്ചുപേര്‍ മരിച്ചു. സൈനികന്റെ പേര് വിവരങ്ങള്‍ പുറത്തുവിട്ടിട്ടില്ല. എട്ട് സൈനികരെ സുരക്ഷിതമായി രക്ഷപ്പെടുത്തിയതായി സൈനിക വക്താവ് അറിയിച്ചു.
മധ്യ കശ്മിരിലെ ഗന്ധര്‍ബാല്‍ ജില്ലയിലെ സോനാമാര്‍ഗിലെ സൈനിക ക്യാംപിനടുത്താണ് ഇന്നലെ പുലര്‍ച്ചെ 5.45ന് മഞ്ഞിടിച്ചിലുണ്ടായത്. കനത്ത മഞ്ഞു വീഴ്ചയുണ്ടായ സാഹചര്യത്തില്‍ അപകടമുണ്ടാകുമെന്ന് നാട്ടുകാര്‍ക്ക് മുന്നറിയിപ്പ് നല്‍കിയിരുന്നു. ഇതിനിടയിലാണ് മഞ്ഞിടിച്ചിലുണ്ടായി സൈനികനും നാല് ഗ്രാമീണരും മരിച്ചത്. മലകളിലും മല അടിവാരത്തും താമസിയ്ക്കരുതെന്ന് നാട്ടുകാര്‍ക്ക് കാലാവസ്ഥാ വിഭാഗം മുന്നറിയിപ്പു നല്‍കിയിട്ടുണ്ട്.
കഴിഞ്ഞ ദിവസം മഞ്ഞുമലയിടിഞ്ഞ് ഒരു വീട്ടിലെ നാലുപേര്‍ മരിച്ചിരുന്നു.
ഗുറേസിനടുത്ത തുലൈല്‍ പ്രദേശത്തെ ബദൂഗാം ഗ്രാമത്തിലായിരുന്നു മഞ്ഞിടിച്ചിലുണ്ടായിരുന്നത്.