ന്യൂഡല്‍ഹി: ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ ബി.ജെ.പിയുടെ പ്രതീക്ഷയ്ക്കു മങ്ങലേല്‍പ്പിച്ച് റിബല്‍ ശല്യം രൂക്ഷം. വിവാദ പ്രസംഗകനും ബി.ജെ.പി എം.പിയുമായ യോഗി ആദിത്യനാഥിന്റെ ഹിന്ദു യുവവാഹിനിയാണ്് പാര്‍ട്ടിയ്ക്ക് തലവേദനയുമായി മത്സര രംഗത്തുള്ളത്. കിഴക്കന്‍ ഉത്തര്‍പ്രദേശിലെ മൂന്നുജില്ലകളിലെ ആറുമണ്ഡലങ്ങളില്‍ സ്ഥാനാര്‍ഥികളെ നിര്‍ത്തി ബി.ജെ.പിയെ ഹിന്ദു യുവവാഹിനി വെല്ലുവിളിച്ചിരിക്കുകയാണ്. കുഷിനഗര്‍ ജില്ലയിലെ പദ്രൗന, ഖദ്ദ, ഘോരക്പൂര്‍ ജില്ലയിലെ കസ്യ, പനിയറ, മഹാരാജ് ഗഞ്ച് ജില്ലയിലെ സിസ്വ, ഫരേന്ദ എന്നിവിടങ്ങളിലാണ് സ്ഥാനാര്‍ഥികളെ നിര്‍ത്തിയത്. സംസ്ഥാനത്തുടനീളം 64 മണ്ഡലങ്ങളില്‍ മല്‍സരിക്കുമെന്ന് സംഘടന പ്രഖ്യാപിച്ചിട്ടുമുണ്ട്. യോഗി ആദിത്യനാഥിനെ ബി.ജെ.പിയുടെ മുഖ്യമന്ത്രി സ്ഥാനാര്‍ഥിയായി പ്രഖ്യാപിക്കണമെന്നാണു ജനങ്ങളുടെ ആഗ്രഹമെന്നും എന്നാല്‍ അദ്ദേഹത്തെ കേന്ദ്രതെരഞ്ഞെടുപ്പു സമിതിയില്‍ ഉള്‍പ്പെടുത്തുക പോലും ശ്രമമുണ്ടായില്ലെന്നും യുവ വാഹിനി അധ്യക്ഷന്‍ സുനില്‍ സിങ് ആരോപിച്ചു.
ആദിത്യനാഥിന്റെ ലോക്‌സഭാ മണ്ഡലം കൂടിയാണ് ഖോരക്പൂര്‍. ഈ ആറുമണ്ഡലങ്ങളിലും ബി.ജെ.പി സ്ഥാനാര്‍ഥിയെ നിര്‍ത്തിയിട്ടുണ്ട്. അതേസമയം യുവ വാഹിനി ഒരു സാമൂഹിക പ്രസ്ഥാനമാണെന്നും രാഷ്ട്രീയത്തില്‍ സജീവമാവുന്നത് തങ്ങളുടെ അജണ്ടയല്ലെന്നും ആദിത്യനാഥ് പറഞ്ഞു. മത്സരരംഗത്തുള്ളവര്‍ക്കെതിരേ നടപടിയെടുക്കുമെന്നും അദ്ദേഹം മുന്നറിയിപ്പ് നല്‍കിയിട്ടുണ്ട്.
തെരഞ്ഞെടുപ്പിനു മുമ്പ് ആദിത്യനാഥ് നല്‍കിയ സ്ഥാനാര്‍ഥി പട്ടികയില്‍ ഒരാളെ പോലും അമിത്ഷാ ഉള്‍പ്പെടുത്താന്‍ തയാറായിട്ടില്ല. ഇക്കാരണത്താല്‍ ആദിത്യനാഥും അദ്ദേഹത്തിന്റെ അനുയായികളും കടുത്ത അസംതൃപ്തിയിലാണ്. ആദിത്യനാഥിന്റെ അറിവോടെയാണ് വിമത പ്രവര്‍ത്തനമെന്നാണ് സൂചന.
വിവിധ പാര്‍ട്ടികളില്‍ നിന്നായി എത്തിയവര്‍ക്കു സ്ഥാനാര്‍ഥി പട്ടികയില്‍ അമിത പരിഗണന നല്‍കിയതും വിമത ശല്യങ്ങള്‍ക്ക് ആക്കം കൂട്ടിയിട്ടുണ്ട്. അസംതൃപ്തര്‍ ഡല്‍ഹിയിലെയും ലഖ്‌നോയിലെയും പാര്‍ട്ടി ആസ്ഥാനത്തിനു മുന്നിലെത്തി പ്രതിഷേധിക്കുകയും അമിത്ഷാക്കെതിരേ മുദ്രാവാക്യം വിളിക്കുകയും ചെയ്തിരുന്നു. ഒരുവിഭാഗം പ്രവര്‍ത്തകര്‍ പാര്‍ട്ടി പതാകയും അമിത്ഷാ ഉള്‍പ്പെടെയുള്ള നേതാക്കളുടെ കോലവും കത്തിച്ചു. സീറ്റ് നഷ്ടമായ വിവിധ മണ്ഡലങ്ങളിലെ സ്ഥാനാര്‍ഥി മോഹികള്‍ ഇപ്പോഴും ലഖ്‌നോവിലെ ആസ്ഥാനത്തു തമ്പടിച്ചിരിക്കുകയാണ്.
അതേസമയം, വിമതശല്യം കാരണം പാര്‍ട്ടിയുടെ സ്ഥാനാര്‍ഥി പട്ടികക്ക് അന്തമരൂപംനല്‍കാന്‍ ബി.ജെ.പിക്ക് ഇതുവരെ കഴിഞ്ഞിട്ടില്ല. ആദ്യഘട്ട വോട്ടെടുപ്പിന് ഇനി രണ്ടാഴ്ച പോലും ഇല്ലെന്നിരിക്കെ 270ഓളം സീറ്റുകളില്‍ മാത്രമാണ് സ്ഥാനാര്‍ഥികളെ പ്രഖ്യാപിച്ചത്. ഇനിയും 150ലേറെ സീറ്റുകളില്‍ പ്രഖ്യാപനം ഉണ്ടാവേണ്ടതുണ്ട്.