പരപ്പനങ്ങാടി: മുപ്പത് കോടി രൂപാ ചിലവില്‍ നിര്‍മാണം പൂര്‍ത്തിയാക്കിയ പരപ്പനങ്ങാടി 110 കെ വി വൈദ്യുതി സബ്‌സ്റ്റേഷന്‍ മന്ത്രി എം എം മണി നാടിന് സമര്‍പ്പിച്ചു. ഇന്നലെ വൈകിട്ട് കരിങ്കല്ലത്താണി ജങ്ഷനില്‍ നടന്ന ചടങ്ങില്‍ പി കെ അബ്ദുറബ്ബ് എം എല്‍ എ അധ്യക്ഷനായി. ഇ ടി മുഹമ്മദ് ബഷീര്‍ എം പി മുഖ്യാതിഥിയായി പങ്കെടുത്തു .ചീഫ് എഞ്ചിനീയര്‍ ജെയിമ്‌സ് എം ഡേവിഡ് റിപ്പോര്‍ട്ട് അവതരിപ്പിച്ചു.
1986 ല്‍ മുന്‍ ഉപമുഖ്യമന്ത്രിയായിരുന്ന അവുക്കാദര്‍കുട്ടി നഹ യായിരുന്നു സബ്‌സ്റ്റേഷന്‍ പദ്ധതിക്ക് തുടക്കം കുറിച്ചത്. ഒരുലക്ഷത്തോളം വരുന്ന ഗുണ ഭോക്താക്കള്‍ക്ക് ഇതിന്റെ പ്രയോജനം ലഭിക്കും.
ചേളാരി -കിഴിശ്ശേരി ലൈനില്‍നിന്നും ചെട്ട്യാര്‍മാട് മുതല്‍ പതിനഞ്ചര കി.മി.ടവര്‍ ലൈന്‍ വലിച്ചാണ് വൈദ്യുതി എത്തിച്ചത്.അറുപത്തിനാല് ടവറുകളാണ്സ്ഥാപിച്ചിട്ടുള്ളത്.പന്ത്രണ്ടര എം.വി.എ.ശേഷിയുള്ള രണ്ടു ട്രാന്‍സ്‌ഫോര്‍മറുകളും അത്യാധുനിക രീതിയിലുള്ള അനുബന്ധ ഉപകരണങ്ങളുമാണ് സജ്ജമാക്കിയിട്ടുള്ളത് .ഇതില്‍ നിന്ന് ആറു ഫീഡറിലേക്ക് (തലപ്പാറ, വള്ളിക്കുന്ന്, പരപ്പനങ്ങാടി, പരിയാപുരം ' താനൂര്‍ , മൂന്നിയൂര്‍ ഭാഗങ്ങള്‍ ) വൈദ്യുതി നല്‍കും.
സര്‍ക്കാറും കെ.എസ്.ഇ.ബിയും സംയുക്തമായി ആവിഷ്‌കരിച്ച സമ്പൂര്‍ണ വൈദ്യുതീകരണ പദ്ധതി തിരൂരങ്ങാടി മണ്ഡലത്തില്‍ പൂര്‍ത്തീകരിച്ചു. ഇതിന്റെ പദ്ധതി പൂര്‍ത്തീകരണ പ്രഖ്യാപനവും മന്ത്രി നിര്‍വഹിച്ചു.
പരിപാടിയില്‍ കെ എസ് ഇ ബി ഡയറക്ടര്‍ ഡോ.വി ശിവദാസന്‍ ,ജില്ലാ പഞ്ചായത്ത് പ്രസിഡന്റ് എ പി ഉണ്ണികൃഷ്ണന്‍ ,പരപ്പനങ്ങാടി മുനിസിപ്പല്‍ ചെയര്‍പേഴ്‌സണ്‍ വി വി ജമീല ടീച്ചര്‍ ,ബ്ലോക്ക് പഞ്ചായത്ത് പ്രസിഡന്റ് അബ്ദുല്‍കലാം മാസ്റ്റര്‍ ,തെന്നല പഞ്ചായത്ത് പ്രസിഡന്റ് എം പി കുഞ്ഞിമൊയ്തീന്‍ , മലപ്പുറം എ ഡി എം സയ്യിദ് അലി ,നഗരസഭാ കൗണ്‍സിലര്‍ കെ കെ സമദ് ,സംസ്ഥാന അപ്പക്‌സ് ബോര്‍ഡ് പ്രസിഡന്റ് പാലക്കണ്ടി വേലായുധന്‍ ,സംസ്ഥാന ആഭരണ തൊഴിലാളി ക്ഷേമ ബോര്‍ഡ് ചെയര്‍മാന്‍ വി പി സോമസുന്ദരന്‍ ,വിവിധ രാഷ്ട്രീയ പാര്‍ട്ടി പ്രതിനിധികളായ വേലായുധന്‍ വള്ളിക്കുന്ന് ,എം പി ഹംസക്കോയ ,ഉമ്മര്‍ ഒട്ടുമ്മല്‍ ,പി ജഗന്നിവാസന്‍ ,മലയില്‍ പ്രഭാകരന്‍ ,സി ഉണ്ണികൃഷ്ണന്‍ ,വി വി കുഞ്ഞാമു ,പങ്കണിക്കാടന്‍ അബ്ദുല്‍കരീം ,കവറൊടി മുഹമ്മദ് മാസ്റ്റര്‍ ,വ്യാപാരി പ്രതിനിധികളായ എം വി മുഹമ്മദലി ,ഗോപാലകൃഷ്ണന്‍ എന്നിവര്‍ സംസാരിച്ചു. പി വിജയകുമാരി സ്വാഗതവും എസ് പരമേശ്വരന്‍ നന്ദിയും പറഞ്ഞു.