തേഞ്ഞിപ്പലം : ദേശീയ ജൂനിയര്‍ താരങ്ങളായ കേരളത്തിന്റെ മരിയ ജയ്‌സണും രുഗ്മ ഉദയനും പരിശീലനത്തിനായി ഇതിഹാസങ്ങളുടെ കീഴിലേക്ക്. ഒളിംപിക്‌സ് സ്വപ്നങ്ങളിലേക്ക് ചിറകു വിടര്‍ത്തി പറക്കാന്‍ ലക്ഷ്യമിട്ട് ഇരുവരും അഞ്ജുബോബി സ്‌പോര്‍ട്‌സ് ഫൗണ്ടേഷനില്‍ പ്രവേശനം നേടി. ലോക ജംപിങ് പിറ്റിലെ ഇതിഹാസങ്ങളായ മൈക്കല്‍ പവലിന്റെയും മൈക്ക് കേണ്‍ലേയുടെയും ശിക്ഷണത്തിലേക്കാണ് ഇരുവരും അഞ്ജുബോബി സ്‌പോര്‍ട്‌സ് ഫൗണ്ടേഷനിലൂടെ എത്തുന്നത്. പോള്‍വോള്‍ട്ട് ഉപേക്ഷിച്ചാണ് മരിയ ലോംങ്ജംപിലേക്ക് വഴിമാറുന്നത്. 

അഞ്ചു വര്‍ഷക്കാലമായി ദേശീയ സംസ്ഥാന സ്‌കൂള്‍ മീറ്റുകളിലും ദേശീയ ജൂനിയര്‍ മീറ്റുകളിലും എതിരാളികളില്ലാതെയാണ് ഉയരങ്ങളുടെ ക്രോസ്ബാറുകള്‍ മരിയ ജയ്‌സണ്‍ താണ്ടിയത്.
രുഗ്മ ഉദയനാവട്ടെ ദേശീയ സ്‌കൂള്‍ മീറ്റിലെ സ്വര്‍ണ ജേതാവാണ്. മികച്ച പരിശീലനവും ഉന്നത പഠനത്തിനുള്ള സൗകര്യങ്ങളും അഞ്ജുബോബി സ്‌പോര്‍ട്‌സ് ഫൗണ്ടേഷനില്‍ നിന്നും ലഭിക്കുമെന്ന ഉറപ്പ് ലഭിച്ചതോടെയാണ് ഇരുവരും കേരളം വിടാന്‍ തീരുമാനിച്ചത്. പ്ലസ് ടു പരീക്ഷയില്‍ മികച്ച വിജയം നേടിയ ഇരുവര്‍ക്കും ബംഗളൂരുവിലെ ജെയിന്‍ കോളജിലാണ് ഉന്നത പഠനത്തിന് പ്രവേശനം ഒരുക്കിയിട്ടുള്ളത്.