വടക്കാഞ്ചേരി: ഒരു നൂറ്റാണ്ടിന്റെ ചരിത്രം പേറുന്ന മുത്തശി മാവിന് വൃക്ഷ സ്‌നേഹികളുടെ ആദരം. മിണാലൂര്‍ കുറ്റിയങ്കാവ് പൂരത്തിന്റെ ഒരു നൂറ്റാണ്ടുകാലത്തെ ചരിത്രസാക്ഷിയായി പൂര്‍ണ്ണ ആരോഗ്യത്തോടെ കഴിയുന്ന മുത്തശി മാവിനെയാണ് സാംസ്‌കാരിക പ്രമുഖരും നാട്ടുകാരും ചേര്‍ന്ന് ആദരിച്ചത്. മുത്തശി മരത്തിനു ചുറ്റും തറ കെട്ടി മണ്ണ് നിറച്ചു. മാലിന്യങ്ങള്‍ നീക്കം ചെയ്തു. മാവിന്‍ ചുവട്ടില്‍ വെള്ളം ഒഴിച്ച് സംരക്ഷിക്കുന്നതിനും സംവിധാനം ഒരുക്കി. മരമുത്തശിയെ ആദരിക്കുന്നതിന് മിണാലൂര്‍ ദേശ വാസികളോടൊപ്പം കാരികേച്ചറും നടനുമായ ജയരാജ് വാര്യരും എത്തിയത് ആവേശമായി. ആദരീയണം ചടങ്ങ് ജയരാജ് വാരിയര്‍ ഉദ്ഘാടനം ചെയ്തു. മുന്‍സിപ്പല്‍ വൈസ് ചെയര്‍മാന്‍ എം.ആര്‍ അനൂപ് കിഷോര്‍ അധ്യക്ഷനായി. വടക്കാഞ്ചേരി പൊലിസ് സര്‍ക്കിള്‍ ഇന്‍സ്‌പെക്ടര്‍ ടി.എസ് സിനോജ്, നഗരസഭ കൗണ്‍സിലര്‍ നളിനി വത്സന്‍ എന്നിവര്‍ സംസാരിച്ചു.