തളിപ്പറമ്പ്: അബ്ദുല്‍ ഖാദര്‍ വധക്കേസില്‍ റിമാന്‍ഡില്‍ കഴിയുന്ന അഞ്ച് പ്രതികളേയും തളിപ്പറമ്പ് സി.ഐ കെ.ഇ പ്രേമചന്ദ്രന്‍ കൂടുതല്‍ ചോദ്യം ചെയ്യുന്നതിനായി അഞ്ച് ദിവസത്തേക്ക് ഇന്നലെ രാവിലെ കസ്റ്റഡിയില്‍ വാങ്ങി. ഇവരെ കാണാന്‍ എത്തിയ വായാട് സ്വദേശികളായ രണ്ടുപേരെ സി.ഐയുടെ സ്‌ക്വാഡ് പയ്യന്നൂര്‍ മജിസ്‌ട്രേറ്റ് കോടതി പരിസരത്തുനിന്ന് ഓടിച്ചിട്ട് പിടികൂടിയെങ്കിലും വൈകുന്നേരത്തോടെ ചോദ്യം ചെയ്ത് വിട്ടയച്ചു. പ്രതികളെ കൃത്യം നടന്ന കാരക്കുണ്ട് തവളക്കുളത്തില്‍ എത്തിച്ച് കൂടുതല്‍ തെളിവെടുപ്പ് നടത്തും. ഇവിടെ വച്ചുള്ള മര്‍ദനത്തിലാണ് ഖാദര്‍ മരിക്കാനിടയായത്. ഖാദറിന്റെ ഉമ്മയുടെ പരാതിയില്‍ ഭാര്യ ഷെരീഫയെ അടുത്ത ദിവസം ചോദ്യം ചെയ്‌തേക്കും. പ്രതികളില്‍ അബ്ദുല്ലകുട്ടിയുമായി ഷെരീഫ നിരവധി തവണ ഫോണില്‍ ബന്ധപ്പെട്ടതായി തെളിഞ്ഞിട്ടുണ്ട്. പ്രതികളേയും ഷെരീഫയേയും ചോദ്യം ചെയ്യുന്നതോടെ പ്രതികളുടെ എണ്ണം ഇനിയും കൂടാനിടയുണ്ട്. ഇത്തരത്തിലൊരു കേസ് അര്‍ഹിക്കുന്ന ഗൗരവത്തോടെ കൈകാര്യം ചെയ്തില്ലെന്ന് പൊലിസിലെ ഉന്നതകേന്ദ്രങ്ങളില്‍ നിന്ന് തന്നെ വിമര്‍ശനമുയര്‍ന്നതിനാല്‍ കൂടുതല്‍ കാര്യക്ഷമമായി അന്വേഷണം നടത്തുന്നുണ്ട്.