പാലക്കാട്: ജില്ലാ കലക്ടറുടെ പ്രത്യേക സ്‌ക്വാഡിലെ  ഉദ്യോഗസ്ഥനെ മാവോവാദിയായി ചിത്രീകരിച്ച്  കലക്ടറേറ്റ് പരിസരത്ത് പോസ്റ്ററുകള്‍ പതിച്ച  ഖനന മാഫിയയുടെ നീക്കത്തില്‍ പൊലിസ് അന്വേഷണം തുടങ്ങി. ഖനന മാഫിയക്കും, അരികടത്തിനുമെതിരേ കര്‍ശന നടപടിയെടുത്ത ഉദ്യോഗസ്ഥനെ മാവോവാദിയായി ചിത്രീകരിക്കുന്നതിലൂടെ ഭരണനേതൃത്വങ്ങളില്‍ സ്വാധീനം  ചെലുത്തി സ്ഥലം മാറ്റാനാണ് മാഫിയ സംഘം  നീക്കം നടത്തുന്നത്.
ഉദ്യോഗസ്ഥന്റെ പേരും ഫോണ്‍ നമ്പറും മറ്റും പോസ്റ്ററില്‍ അച്ചടിച്ചിട്ടുണ്ട്. പോസ്റ്റര്‍ തയാറാക്കിയ പ്രസിനെ കുറിച്ച് പൊലിസ് അന്വേഷിക്കുന്നുണ്ട്.
ജനുവരി 26ന് ബി.ജെ.പി ജില്ലാനേതാവിന്റെ മുതലമടയിലെ അനധികൃത ചെങ്കല്‍ചൂളയില്‍ കലക്ടറും, സ്‌ക്വാഡും പരിശോധന നടത്തുകയും കാര്‍ഷിക ആവശ്യത്തിനുള്ള മോട്ടോര്‍ ഉപയോഗിച്ച് ചൂളയിലേക്ക് വെള്ളം ചോര്‍ത്തുന്നതായി കണ്ടെത്തുകയും ചെയ്തിരുന്നു. ബോര്‍വെല്‍ കുഴിച്ചും, കുടിവെള്ളത്തിന് ഉപയോഗിക്കുന്ന കിണറ്റില്‍നിന്നും രണ്ട് മോട്ടോര്‍ ഉപയോഗിച്ച് ചൂളയില്‍ കല്ല് ഉണ്ടാക്കാന്‍ വെള്ളം കൊണ്ടു പോവുന്നതായും കണ്ടെത്തി. ഇതിനെതിരേ ജില്ലാ കലക്ടര്‍ കര്‍ശന നടപടിയെടുത്തു വരുന്നതിനിടയിലാണ് സ്‌ക്വാഡിലെ ഒരു ഉദ്യോഗസ്ഥനെതിരേ പോസ്റ്റര്‍ പതിച്ചത്.
ഇതുസംബന്ധിച്ച്  ഉദ്യോഗസ്ഥന്‍ സൗത് പൊലിസില്‍ പരാതി നല്‍കിയതോടെയാണ് അന്വേഷണം തുടങ്ങിയത്. ഇന്നലെ പതിച്ച പോസ്റ്ററുകള്‍ പൂര്‍ണമായും പൊലിസ് നീക്കിയിട്ടുണ്ട്.
മുതലമടയിലെ ക്വാറി, ചെങ്കല്ല് മാഫിയ  കുറേക്കാലമായി സത്യസന്ധമായി പ്രവര്‍ത്തിക്കുന്ന  സ്‌ക്വാഡിലെ ഉദ്യോഗസ്ഥനെതിരേ മുഖ്യമന്ത്രിയുള്‍പ്പെടെ ഉള്ളവര്‍ക്ക് വ്യാജ പരാതികള്‍ അയച്ചുകൊണ്ടിരിക്കുന്നുണ്ട്. കലക്ടറേറ്റില്‍ ഈ പോസ്റ്ററൊട്ടിയതിന് പിന്നിലെ ശക്തികളെക്കുറിച്ചും പൊലിസ് അന്വേഷണം ശക്തിപ്പെടുത്തണമെന്നും, ഖനന ലോബ്ബിക്കെതിരേ സത്യസന്ധമായി നടപടിയെടുക്കുന്ന  ഉദ്യോഗസ്ഥന്റെ  പ്രവര്‍ത്തനങ്ങള്‍ക്ക് പൊതു സമൂഹം പിന്തുണ നല്‍കണമെന്നും പരിസ്ഥിതി പ്രവര്‍ത്തകനായ ഡോ. പി.എസ് പണിക്കര്‍ ആവശ്യപ്പെട്ടു.  
ജില്ലാ കലക്ടര്‍ മാഫിയാ സംഘങ്ങളെ നിലക്ക് നിര്‍ത്താന്‍  ചെങ്കല്‍ ചൂളകളിലും, ക്വാറികളിലും പരിശോധന ശക്തമാക്കണമെന്നും അദ്ദേഹം ആവശ്യപ്പെട്ടു. കുടിക്കാന്‍ വെള്ളം കിട്ടാതെ ജനങ്ങള്‍  ദാഹിച്ചു വലയുന്ന  സമയത്തും ചൂള മാഫിയകള്‍ അനധികൃതമായി ശുദ്ധ ജലം ചോര്‍ത്തിയെടുത്ത്  ചെങ്കല്ലുകള്‍ ഉണ്ടാക്കി കൊണ്ടിരിക്കുന്നത് ഗൗരവമായി കാണണമെന്നാവശ്യപ്പെട്ട്  ഏര്‍ത്ത് വാച്ച് കേരള മുഖ്യമന്ത്രിക്കും റവന്യു മന്ത്രിക്കും പരാതി അയച്ചു.