പയ്യന്നൂര്‍: സ്വകാര്യ ബസ് പണിമുടക്ക് പയ്യന്നൂരിലെ യാത്രക്കാരെ ദുരിതത്തിലാക്കി. പണിമുടക്ക് അറിയാതെ എത്തിയ യാത്രക്കാര്‍ പെരുവഴിയിലായി. കാഞ്ഞങ്ങാട്, കാസര്‍കോട് ഭാഗത്തു നിന്നും എത്തിയ സ്വകാര്യ ബസുകള്‍ പെരുമ്പയില്‍ സര്‍വിസ് അവസാനിപ്പിച്ചു. കെ.എസ്.ആര്‍.ടി.സി പണിമുടക്കും യാത്രക്കാരെ ബാധിച്ചു. പണിമുടക്കിയ തൊഴിലാളികള്‍ പയ്യന്നൂരില്‍ സര്‍വിസ് നടത്തുന്ന ബസുകള്‍ തടയാന്‍ ശ്രമിച്ചത് സംഘര്‍ഷത്തിന് കാരണമായി.
രാവിലെ പ്രകടനമായി എത്തിയ തൊഴിലാളികള്‍ ബസുകള്‍ തടയുകയായിരുന്നു. ഇത് വാക്കേറ്റത്തിനും ഗതാഗത തടസത്തിനും കാരണമായി. സ്ഥലത്തെത്തിയ പൊലിസിന് നേരെയും തൊഴിലാളികള്‍ തിരിഞ്ഞു. സമരക്കാരെ പൊലിസ് ലാത്തിവീശി ഓടിച്ചു. ഗതാഗത തടസം സൃഷ്ടിക്കുകയും പൊലിസിന്റെ കൃത്യനിര്‍വഹണം തടസപ്പെടുത്തുകയും ചെയ്ത സംഭവത്തില്‍ ഏഴു ബസ് ജീവനക്കാരെ എസ്.ഐ എ.വി ദിനേശനും സംഘവും അറസ്റ്റ് ചെയ്തു. സ്വകാര്യ ബസ് ജീവനക്കാരായ കുഞ്ഞിമംഗലത്തെ കെ.വി ജയന്‍(37), ചെറുവത്തൂര്‍ കണ്ണങ്കൈയിലെ പി പ്രിയേഷ്(33), എ.പി പ്രദീപന്‍ (43), ഓലാട്ടെ ടി.പി സുരേഷ്(33), കാഞ്ഞങ്ങാട് മാവുങ്കാലിലെ കെ.ടി ജയേഷ്(33), ബേഡകത്തെ ബി നിഷാന്ത്(29), പള്ളിക്കര പാക്കത്തെ ആര്‍.വി പ്രകാശ്(34) എന്നിവരെയാണ് അറസ്റ്റ് ചെയ്തത്. ഇവരെ പിന്നീട് ജാമ്യത്തില്‍ വിട്ടു.