ആറ്റിങ്ങല്‍: ശമ്പളം മുടങ്ങിയതില്‍ പ്രതിഷേധിച്ച് കെ.എസ്.ആര്‍.ടി.സിയിലെ സി.ഐ.ടി.യു ഒഴികെയുള്ള യൂണിയനുകള്‍ ആരംഭിച്ച പണിമുടക്ക് ആറ്റിങ്ങലില്‍ വാക്കേറ്റത്തിലും അടിപിടിയിലും കലാശിച്ചു. ബസ് സര്‍വീസ് നടത്താന്‍ സന്നദ്ധരായി എത്തിയ സി.ഐ.ടി.യു പ്രവര്‍ത്തകരും മറ്റ് യൂണിയന്‍ പ്രവര്‍ത്തകരും തമ്മിലാണ് സംഘര്‍ഷം ഉണ്ടായത്. അടിപിടിയില്‍ സി.ഐ.ടി.യു ആറ്റിങ്ങല്‍ യൂണിറ്റ് സെക്രട്ടറിയും ഡ്രൈവറുമായ ആര്‍.പി.അജിയ്ക്ക് പരിക്കേറ്റു.
ഇയാളെ വലിയകുന്ന് താലൂക്ക് ആശുപത്രിയില്‍ പ്രവേശിപ്പിച്ചു. 107 സര്‍വീസുകള്‍ നടത്തുന്ന ആറ്റിങ്ങല്‍ ഡിപ്പോയില്‍ വെള്ളിയാഴ്ച 20 സര്‍വീസ് മാത്രമാണ് നടന്നത്. സി.ഐ.ടി.യു ഒഴികെയുളള യൂണിയനുകള്‍ ആറ്റിങ്ങല്‍ ഡിപ്പോയില്‍ പ്രകടനവും നടസത്തി. സംഘര്‍ഷം അറിഞ്ഞ് പൊലീസ് എത്തിയാണ് പ്രശ്‌നം പരിഹരിച്ചത്.