വാഷിങ്ടണ്‍: അമേരിക്കയുടെ ചാര ഉപഗ്രഹം ലക്ഷ്യത്തിലെത്താനാകാതെ പാതിവഴിയില്‍ തകര്‍ന്നുവീണതായി റിപ്പോര്‍ട്ട്. കഴിഞ്ഞ ഞായറാഴ്ച ഫ്‌ളോറിഡയിലുള്ള കേപ് കനവെറല്‍ ബഹിരാകാശകേന്ദ്രത്തില്‍നിന്നു വിക്ഷേപിച്ച സ്‌പൈസ്എക്‌സ് ഉപഗ്രഹമാണ് ഭ്രമണപഥത്തിലെത്താനാകാതെ സമ്പൂര്‍ണമായി തകര്‍ന്നത്. കഴിഞ്ഞ ദിവസം രണ്ട് യു.എസ് വൃത്തങ്ങളാണു വാര്‍ത്ത പുറത്തുവിട്ടത്.
നോര്‍ത്ത്‌റോപ്പ് ഗ്രുമാന്‍ കോര്‍പ്പ് നിര്‍മിച്ച രഹസ്യാന്വേഷണ ഉപഗ്രഹം രണ്ടാംഘട്ടത്തില്‍ ഫാല്‍ക്കണ്‍ 9 റോക്കറ്റില്‍നിന്ന് വേര്‍പ്പെടാനാകാതെ വന്നതാണ് ദൗത്യം പരാജയപ്പെടാന്‍ കാരണം. തുടര്‍ന്ന് ഉപഗ്രഹം തകര്‍ന്ന് കടലിലേക്കു പതിക്കുകയായിരുന്നുവെന്ന് പേരു വെളിപ്പെടുത്താത്ത ഔദ്യോഗിക വൃത്തങ്ങള്‍ പറഞ്ഞു.
അമേരിക്കന്‍ പത്രമായ വാള്‍സ്ട്രീറ്റ് ജേണലാണു ദൗത്യം പരാജയപ്പെട്ട വിവരം ആദ്യം പുറത്തുവിട്ടത്. സംഭവത്തില്‍ അട്ടിമറിയോ പുറത്തുനിന്നുള്ള ഇടപെടലോ ഉള്ളതായി അറിവില്ലെന്നും അന്വേഷണം ആരംഭിച്ചിട്ടുണ്ടെന്നും വൃത്തങ്ങള്‍ കൂട്ടിച്ചേര്‍ത്തു. സ്‌പൈസ്എക്‌സ് വക്താവ് ജെയിംസ് ഗ്ലീസോണ്‍ സംഭവത്തെ കുറിച്ച് പ്രതികരിക്കാന്‍ വിസമ്മതിച്ചു.