ന്യൂയോര്‍ക്ക്: അമേരിക്കയിലെ എട്ടു സംസ്ഥാനങ്ങളില്‍ ആധുനിക രീതിയിലുള്ള ക്രിക്കറ്റ് സ്റ്റേഡിയങ്ങള്‍ നിര്‍മിക്കാന്‍ സ്‌പോര്‍ട്‌സ് ഡവലപ്പ്‌മെന്റ് കമ്പനിയായ ഗ്ലോബല്‍ സ്‌പോര്‍ട്‌സ് വെഞ്ച്വേഴ്‌സ് ഒരുങ്ങുന്നു. 2.4 കോടി ഡോളര്‍ മുടക്കിയാണു പദ്ധതി. ന്യൂയോര്‍ക്ക്, ന്യൂജഴ്‌സി, വാഷിങ്ടന്‍ ഡി.സി, ജോര്‍ജിയ, ഫ്‌ളോറിഡ, ടെക്‌സാസ്, ഇല്ലിനോയ്‌സ്, കലിഫോര്‍ണിയ സംസ്ഥാനങ്ങളിലെ അധികൃതരുമായി സ്റ്റേഡിയം നിര്‍മിക്കുന്നതിനെക്കുറിച്ചു ചര്‍ച്ചകള്‍ പുരോഗമിക്കുകയാണ്.
ഭരണാധികാരികളില്‍ നിന്നു അനുകൂല പ്രതികരണമുണ്ടാകുമെന്നാണ് പ്രതീക്ഷിക്കുന്നതെന്നു ഗ്ലോബല്‍ സ്‌പോര്‍ട്‌സ് വെഞ്ച്വേഴ്‌സ് ഇന്ത്യന്‍- അമേരിക്കന്‍ ചെയര്‍മാന്‍ ജഗദീഷ് പാണ്ഡെ വ്യക്തമാക്കി.
2024ലെ ലോക ടി20 മത്സരങ്ങള്‍ അമേരിക്കയില്‍ നടത്തുന്നതു സംബന്ധിച്ച് അന്താരാഷ്ട്ര ക്രിക്കറ്റ് കൗണ്‍സില്‍ ആലോചിക്കുന്നതായി റിപ്പോര്‍ട്ടുകളുണ്ടായിരുന്നു.
നേരത്തെ ക്രിക്കറ്റ് പ്രചരിപ്പിക്കുന്നതിന്റെ ഭാഗമായി ഇന്ത്യ- വെസ്റ്റിന്‍ഡീസ് ടീമുകള്‍ അമേരിക്കയില്‍ വച്ച് ടി20 പോരാട്ടത്തില്‍ ഏറ്റുമുട്ടിയിരുന്നു. ഫ്‌ളോറിഡയിലെ ലൗഡര്‍ഹില്‍ സ്റ്റേഡിയത്തില്‍ 2016 ഓഗസ്റ്റ് 27, 28 തിയതികളിലായിരുന്നു മത്സരം.