തിരുവനന്തപുരം: ലോ അക്കാദമി സമരത്തിന്റെ പേരില്‍ കടുത്ത വിമര്‍ശനം നേരിടുന്ന എസ്.എഫ്.ഐക്കെതിരേ സാമൂഹ്യമാധ്യമങ്ങള്‍ക്കു പുറമെ വിക്കിപീഡിയയിലും ട്രോളുകളുടെ പൂരം. സാമൂഹ്യമാധ്യമങ്ങളില്‍ എസ്.എഫ്.ഐക്കെതിരായ ട്രോളുകള്‍ നിറയുന്നതിനിടയില്‍ വിക്കിപീഡിയയിലെ എസ്.എഫ്.ഐയുടെ പേജും ട്രോളര്‍മാര്‍ കൈയേറി.
സംഘടനയെ പരിചയപ്പെടുത്തുന്നിടത്തു നിന്ന് തുടങ്ങുന്നു ട്രോള്‍. ഇടതുപക്ഷ അനുഭാവമുള്ള ഫാസിസ്റ്റ് വിദ്യാര്‍ഥ ിസംഘടനയെന്നാണ് എസ്.എഫ്.ഐയെ വിശേഷിപ്പിക്കുന്നത്. പൂര്‍ണരൂപം 'ശിഖണ്ടി ഫെഡറേഷന്‍ ഓഫ് ഇന്ത്യ' എന്ന് എഡിറ്റ് ചെയ്തു മാറ്റി. നാരായണന്‍ നായരെ സംഘടനയുടെ പ്രസിഡന്റും ലക്ഷ്മി നായരെ ജനറല്‍ സെക്രട്ടറിയുമാക്കി. 2017 ജനുവരി 30 മുതല്‍ 31 വരെ തിരുവനന്തപുരത്ത് ലോ അക്കാദമിയില്‍ നടന്ന സമരത്തിലാണ് എസ്.എഫ്.ഐയുടെ മരണം. കേരളത്തിലെ കാമ്പസുകളില്‍ കൈയൂക്കിന്റെ ബലത്തിലാണ് എസ്.എഫ്.ഐ മറ്റു വിദ്യാര്‍ഥി സംഘടനകളുടെ സാന്നിധ്യം തടയുന്നത്. ദലിത്- കീഴാള വിരുദ്ധ സമീപനം എസ്.എഫ്.ഐയില്‍ നിന്ന് ധാരാളം റിപ്പോര്‍ട്ട് ചെയ്യപ്പെട്ടിട്ടുണ്ട്. നിരവധി വിദ്യാര്‍ഥികള്‍ എസ്.എഫ്.ഐ ആക്രമണത്തിന് വിധേയരായിട്ടുണ്ട്. ഓരോ വര്‍ഷവും ദലിത്- മുസ്‌ലിം വിദ്യാര്‍ഥികള്‍ക്കെതിരേയും ഇതര വിദ്യാര്‍ഥി സംഘടനകള്‍ക്കെതിരേയും ആക്രമണം നടത്തുന്ന എസ്.എഫ്.ഐ ശൈലിക്കെതിരേ വ്യാപക വിമര്‍ശനമുണ്ടെന്നും ട്രോളര്‍മാര്‍ പേജില്‍ ചേര്‍ത്തു. ശനിയാഴ്ചയാണ് തിരുത്തലുകള്‍ വ്യാപകമായി ശ്രദ്ധിക്കപ്പെട്ടത്. ഇന്നലെ അതെല്ലാം നീക്കം ചെയ്യപ്പെട്ടു.