കൊച്ചി: കാഴ്ച പരിമിതരുടെ ടി 20 ലോകകപ്പ് ക്രിക്കറ്റ്  ടൂര്‍ണമെന്റില്‍ ആസ്‌ത്രേലിയക്കെതിരേ ഇന്ത്യക്ക് തകര്‍പ്പന്‍ ജയം. 128 റണ്‍സിനാണ് ഇന്ത്യയുടെ ജയം. മത്സരത്തില്‍ ടോസ് നേടിയ ആസ്‌ത്രേലിയ ബൗളിങ് തിരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത ഇന്ത്യ 20 ഓവറില്‍ 272 റണ്‍സെടുത്തു. ഇന്ത്യന്‍ ബാറ്റ്്‌സ്മാന്‍ സുനില്‍ 150 റണ്‍സും മലയാളി താരം മുഹമ്മദ് ഫര്‍ഹാന്‍ 52 റണ്‍സുമെടുത്തു.
മറുപടി ബാറ്റിങ്ങിനിറങ്ങിയ ആസ്‌ത്രേലിയക്ക് ആറു വിക്കറ്റ് നഷ്ടത്തില്‍ 144 റണ്‍സെടുക്കാനേ കഴിഞ്ഞുള്ളൂ. സുനിലാണ് മാന്‍ ഓഫ് ദ മാച്ച്. മുന്‍ ഇന്ത്യന്‍ ടീം ഫാസ്റ്റ് ബൗളര്‍ ശ്രീശാന്ത്, പി.ടി തോമസ് എംഎല്‍എ എന്നിവര്‍ സമ്മാനദാനം നിര്‍വഹിച്ചു. തിങ്കളാഴ്ച രാജഗിരി കോളജ് ഗ്രൗണ്ടില്‍ നടക്കുന്ന മത്സരത്തില്‍ ആസ്‌ത്രേലിയ ശ്രീലങ്കയെ നേരിടും.