വളാഞ്ചേരി: ഉപതെരഞ്ഞെടുപ്പ് നടന്ന എടയൂര്‍ ഗ്രാമപഞ്ചായത്തിലെ 16ാംവാര്‍ഡായ തിണ്ടലത്തു യു.ഡി.എഫ് സീറ്റ് നിലനിര്‍ത്തി. കോണ്‍ഗ്രസിലെ കെ.കെ മോഹനകൃഷ്ണന്‍ 180 വോട്ടിന്റെ ഭൂരിപക്ഷത്തിനു വിജയിച്ചു. മോഹനകൃഷ്ണനു 609 വോട്ടും എല്‍.ഡി.എഫ് സ്വതന്ത്രന്‍ പി.ടി അനില്‍കുമാറിനു 429 വോട്ടും ബി.ജെ.പിയിലെ കെ.ടി അനില്‍ കുമാറിനു 91 വോട്ടും ലഭിച്ചു. കഴിഞ്ഞ തവണ 85 വോട്ടായിരുന്നു യു.ഡി.എഫിന്റെ ഭൂരിപക്ഷം. കോണ്‍ഗ്രസ് മണ്ഡലം പ്രസിഡന്റും ഗ്രാമപഞ്ചായത്ത് സ്ഥിരംസമിതി അധ്യക്ഷനുമായിരുന്ന അഡ്വ. കെ. കമലാസനന്റെ നിര്യാണത്തെ തുടര്‍ന്നായിരുന്നു ഉപതെരഞ്ഞെടുപ്പ്. 19 വാര്‍ഡുകളുള്ള ഗ്രാമപഞ്ചായത്തില്‍ ഇരു മുന്നണികള്‍ക്കും ഒന്‍പത് അംഗങ്ങള്‍ വീതമുണ്ട്. ബി.ജെ.പിക്ക് ഒരംഗവുമുണ്ട്. ബി.ജെ.പി അംഗം വോട്ട് അസാധുവാക്കിയതിനെ തുടര്‍ന്നു നറുക്കെടുപ്പിലൂടെയാണ് എല്‍.ഡി.എഫിനു ഗ്രാമപഞ്ചായത്തില്‍ ഭരണം ലഭിച്ചിരുന്നത്.