തിരുവനന്തപുരം: മുന്‍ കേന്ദ്രമന്ത്രിയും മുസ്്‌ലിം ലീഗ് ദേശീയ അധ്യക്ഷനുമായ ഇ. അഹമ്മദ് എം.പിയുടെ നിര്യാണവുമായി ബന്ധപ്പെട്ട കേന്ദ്ര സര്‍ക്കാര്‍ നടപടിയില്‍ കടുത്ത പ്രതിഷേധം രേഖപ്പെടുത്തി പാര്‍ട്ടി സംസ്ഥാന പ്രവര്‍ത്തകസമിതി.
ഇതു ജനാധിപത്യത്തോടും മനുഷ്യത്വത്തോടുമുള്ള ക്രൂരതയാണെന്ന് വ്യക്തമാക്കിക്കൊണ്ട് പ്രവര്‍ത്തകസമിതി 'ഫാസിസം മരണക്കിടക്കയിലും' എന്ന പ്രമേയം പാസാക്കി. ഇതിന്റെ അടിസ്ഥാനത്തില്‍ ഈ മാസം 11ന് എല്ലാ ജില്ലാ ആസ്ഥാനങ്ങളിലും പ്രതിഷേധ സംഗമം നടത്തും.
അഹമ്മദിനെ റാം മനോഹര്‍ ലോഹ്യ ആശുപത്രിയില്‍ എത്തിച്ച ശേഷം ആവശ്യമായ നടപടികള്‍ സ്വീകരിക്കാതിരുന്നപ്പോള്‍ പ്രതിഷേധവുമായി മക്കളോടൊപ്പം നിന്ന കോണ്‍ഗ്രസ് അധ്യക്ഷ സോണിയാ ഗാന്ധിക്കും ഉപാധ്യക്ഷന്‍ രാഹുല്‍ ഗാന്ധിക്കും മറ്റു പാര്‍ട്ടികളിലെ നേതാക്കള്‍ക്കും പ്രവര്‍ത്തകസമിതി നന്ദി രേഖപ്പെടുത്തിയതായി സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ മാധ്യമങ്ങളോടു പറഞ്ഞു. അഹമ്മദിന്റെ വിയോഗവുമായി ബന്ധപ്പെട്ടുണ്ടായ സംഭവങ്ങള്‍ പാര്‍ലമെന്ററി സമിതി അന്വേഷിക്കണമെന്ന് പാര്‍ട്ടി ആവശ്യപ്പെടുന്നതായി ദേശീയ ട്രഷറര്‍ പി.കെ കുഞ്ഞാലിക്കുട്ടി പറഞ്ഞു.
ലോ അക്കാദമി വിഷയത്തില്‍ എസ്.എഫ്.ഐയുമായി മാത്രമല്ല ചര്‍ച്ച നടത്തേണ്ടത്. എല്ലാ വിദ്യാര്‍ഥി സംഘടനകളുമായും രാഷ്ട്രീയ കക്ഷികളുമായും ചര്‍ച്ച ചെയ്ത് പ്രശ്‌നം പരിഹരിക്കണം.
വിദ്യാര്‍ഥികളുടെ ഭാവി ഇല്ലാതാക്കുന്ന നടപടികളൊഴിവാക്കി എത്രയും വേഗം പരിഹാരമുണ്ടാക്കണം. മുത്വലാഖിന്റെ പേരില്‍ ബി.ജെ.പി വിവാദങ്ങള്‍ ഉയര്‍ത്തിവിടുന്നത് തെരഞ്ഞെടുപ്പ് മുന്നില്‍ക്കണ്ടാണ്. ആ ചൂണ്ടയില്‍ കൊത്താന്‍ ലീഗിനെ കിട്ടില്ലെന്നും അദ്ദേഹം പറഞ്ഞു.
സംഘടനാ തെരഞ്ഞെടുപ്പ് നടപടികള്‍ മാര്‍ച്ചില്‍ പൂര്‍ത്തിയാകുമെന്ന് സംസ്ഥാന ജനറല്‍ സെക്രട്ടറി കെ.പി.എ മജീദ് അറിയിച്ചു. ഇനി കാലതാമസമുണ്ടാവില്ല.
മാര്‍ച്ച് മാസത്തോടെ സംസ്ഥാന കമ്മിറ്റി നിലവില്‍ വരും. ബിവറേജസ് ഔട്ട്‌ലറ്റുകള്‍ ദേശീയ പാതയോരത്തുനിന്ന് മാറ്റി ജനവാസ കേന്ദ്രങ്ങളില്‍ സ്ഥാപിക്കുന്നത് തദ്ദേശസ്വയംഭരണ സ്ഥാപനങ്ങളുമായി പോലും യാതൊരു ചര്‍ച്ചകളും കൂടാതെയാണ്. ഇത്തരം നീക്കങ്ങളില്‍ നിന്ന് സര്‍ക്കാര്‍ പിന്മാറണം.
മലപ്പുറം ലോക്‌സഭാ ഉപതെരഞ്ഞെടുപ്പിലെ സ്ഥാനാര്‍ഥിയെക്കുറിച്ച് യോഗത്തില്‍ ചര്‍ച്ചയുണ്ടായില്ല. ഇപ്പോള്‍ അക്കാര്യം ആലോചിക്കുന്നില്ലെന്നും കുഞ്ഞാലിക്കുട്ടി പറഞ്ഞു. എം.പി അബ്ദുസമദ് സമദാനി, പി.കെ.കെ ബാവ എന്നിവരും വാര്‍ത്താസമ്മേളനത്തില്‍ സംബന്ധിച്ചു.