വാഷിങ്ടണ്‍: യു.എസ് പ്രസിഡന്റ് ഡൊണാള്‍ഡ് ട്രംപ് അമേരിക്കയെ റഷ്യയോട് ഉപമിച്ച് നടത്തിയ പ്രസ്താവനയ്‌ക്കെതിരേ ട്രംപിന്റെ പാര്‍ട്ടിയും രംഗത്ത്. റിപ്പബ്ലിക്കന്‍ പാര്‍ട്ടിയും ഡെമോക്രാറ്റിക് പാര്‍ട്ടിയുമാണ് ട്രംപിനെതിരേ രൂക്ഷ വിമര്‍ശനവുമായി രംഗത്തെത്തിയത്.
കഴിഞ്ഞ ദിവസം ഫോക്‌സ്‌ന്യൂസിന് നല്‍കിയ അഭിമുഖത്തിലാണ് റഷ്യ ആളുകളെ കൊല്ലുന്നതുപോലെ യു.എസും ചെയ്തിട്ടില്ലേയെന്ന് ട്രംപ് ചോദിച്ചത്. നിങ്ങള്‍ കരുതുന്നുണ്ടോ അമേരിക്ക നിരപരാധികളെന്ന് എന്നായിരുന്നു ഫോക്‌സ് ന്യൂസിന് വേണ്ടി അഭിമുഖം നടത്തിയ ബില്‍ ഒറെയ്‌ലിയോട് ട്രംപ് ചോദിച്ചത്. ഇതാണ് വിവാദമായത്.

റഷ്യന്‍ പ്രസിഡന്റ് വ്‌ളാദ്്മിര്‍ പുടിനെ അനുകൂലിക്കുന്ന നിലപാടാണ് ട്രംപ് സ്വീകരിക്കുന്നത്. ഇതില്‍ കടുത്ത വിമര്‍ശനമാണ് ട്രംപിന്റെ പാര്‍ട്ടി അംഗങ്ങള്‍ ഉന്നയിക്കുന്നത്. ട്രംപിനെതിരേ മുഖ്യ പ്രതിപക്ഷമായ ഡെമോക്രാറ്റിക് പാര്‍ട്ടിയും പ്രതിഷേധവുമായി രംഗത്തെത്തിയിട്ടുണ്ട്.
റഷ്യയുടെ ഉക്രൈന്‍ അധിനിവേശത്തോടും രാഷ്ട്രീയകൊലപാതകങ്ങളോടും ട്രംപ് മൃദുസമീപനം പുലര്‍ത്തുകയാണെന്ന ആരോപണം ശക്തമാകുകയാണ്.

റഷ്യന്‍ പ്രസിഡന്റ് വ്‌ളാദ്മിര്‍ പുടിനോടുള്ള അനുഭാവം വേണ്ടെന്ന് റിപ്പബ്ലിക്കന്‍ പാര്‍ട്ടി ട്രംപിനോട് നിര്‍ദേശം നല്‍കിയിട്ടുണ്ട്. ഇത്തരം ഘട്ടങ്ങളില്‍ സ്വയം അകലംപാലിക്കണമെന്ന് നേരത്തെ പാര്‍ട്ടി നല്‍കിയ നിര്‍ദേശം വകവയ്കാതെയാണ് ട്രംപിന്റെ നീക്കം.
സെനറ്റ് ന്യൂനപക്ഷ നേതാവ് മിച് മാക് കോണെല്‍ രൂക്ഷ വിമര്‍ശനവുമായി രംഗത്തുവന്നു. റഷ്യയിലെ അമേരിക്കന്‍ അംബാസിഡറും മുന്‍ പ്രസിഡന്റ് ബരാക് ഒബാമയുടെ ഉപദേഷ്ടാവുമായിരുന്ന മൈക്കിള്‍ മക്‌ഫോളും ട്രംപിനെതിരേ രംഗത്തെത്തി.