പള്ളുരുത്തി: ചെല്ലാനം സെന്റ് സെബാസ്റ്റ്യന്‍ പളളി തിരുനാള്‍ ദിനത്തില്‍ പൊലിസും നാട്ടുകാരുമായുണ്ടായ സംഘര്‍ഷത്തെ തുടര്‍ന്ന് പ്രതി ചേര്‍ക്കപ്പെട്ടവരുടെ വീടുകളില്‍ പൊലിസ് അതിക്രമം കാട്ടുന്നതായി നാട്ടുകാര്‍ പത്രസമ്മേളനത്തില്‍ ആരോപിച്ചു. കഴിഞ്ഞ ദിവസം രാത്രി ചെല്ലാനം വാച്ചാക്കല്‍ വാവച്ചന്റെ വീടിന്റെ വാതില്‍ തകര്‍ത്ത് അകത്ത്കയറിയ ശേഷം വീട്ടിലുള്ളവരെ അസഭ്യം പറയുകയും വാഷിംഗ് മെഷീന്‍ ചവിട്ടി തകര്‍ക്കുകയും ചെയ്തു. ഇതേ വീട്ടിലെ ഗ്യാസ് സിലിണ്ടര്‍ കിണറ്റിലെറിഞ്ഞ ശേഷം പൊലിസ് ഗുണ്ടകളെ പോലെ പെരുമാറിയെന്നും പറയുന്നു.
വീടുകളിലുള്ള സ്ത്രീകളോടുപോലും മാന്യമായി പെരുമാറുന്നില്ലെന്നും ഇവര്‍ ആരോപിക്കുന്നു. കഴിഞ്ഞ ദിവസം പോലീസ് കസ്റ്റഡിയിലെടുത്ത പതിനെട്ടുകാരനെ മണിക്കൂറുകളോളം സ്റ്റേഷനില്‍ നിര്‍ത്തി പീഡിപ്പിച്ചതായി കാട്ടി മേലുദ്യോഗസ്ഥര്‍ക്ക് പരാതി നല്‍കി. ജനുവരി 20നാണ് ഗാനമേള നടക്കുന്നതിനിടെയാണ് പൊലിസും നാട്ടുകാരും ഏറ്റുമുട്ടിയത്.
മത്സ്യതൊഴിലാളികള്‍ തിങ്ങിപ്പാര്‍ക്കുന്ന ഇവിടെ തൊഴിലാളികള്‍ക്ക് കടലിലിറങ്ങി പണി യെടുക്കാന്‍ സാധിക്കുന്നില്ലെന്ന് ജനകീയ സമിതി ഭാരവാഹികള്‍ കുറ്റപ്പെടുത്തുന്നു. പൊലിസ് നടപടിയില്‍ പ്രതിഷേധിച്ച് 13ന് രാവിലെ കണ്ണമാലി പൊലിസ് സ്റ്റേഷന്‍ മാര്‍ച്ച് നടത്തുമെന്ന് ജനകീയ സമിതി ഭാരവാഹികള്‍ പത്രസമ്മേളനത്തില്‍ പറഞ്ഞു.
അതേ സമയം പൊലിസ് വീടുകളില്‍ അതിക്രമം നടത്തിയെന്നുള്ളത് ശരിയല്ലെന്ന് കണ്ണമാലി എസ്.ഐ ഷൈജു ഇബ്രാഹിം പറഞ്ഞു.