വിഴിഞ്ഞം: അപകട സാധ്യതയെ തുടര്‍ന്ന് കമ്പി വേലി കെട്ടി സുരക്ഷാ മുന്നറിയിപ്പ് നല്‍കിയിട്ടും വിഴിഞ്ഞം ബൊള്ളാഡ് ടെസ്റ്റ് കേന്ദ്രത്തിന്റെ പരിസരം അപകട മുക്തമായില്ല.
കഴിഞ്ഞ ദിവസം തൊടുപുഴ സ്വദേശിയായ യുവാവിനെ കടല്‍ തിരയില്‍ കാണാതായതാണ് അവസാനത്തെ സംഭവം. അപകടങ്ങളധികവും രാത്രിയിലാണ്  നടക്കുന്നത്. ഇവിടെയെത്തുന്നവര്‍   വഴുക്കല്‍ നിറഞ്ഞ പാറക്കെട്ടുകളിലേക്ക് ഇറങ്ങുന്നതാണ്  അപകടത്തിനു കാരണമാകുന്നത്. ശക്തമായ തിരയില്‍ കാല്‍വഴുതി കടലിലേക്കു വീഴും. മാസങ്ങള്‍ക്കു മുന്‍പ്   ജന്മദിനം ആഘോഷിക്കാനെത്തിയ ജെറ്റ് എയര്‍ലൈന്‍സിന്റെ പൈലറ്റും,ആന്ധ്ര സ്വദേശിയായ സോഫ്റ്റ്‌വെയര്‍ എഞ്ചിനിയറും മരിച്ചത്  സമാന രീതിയിലായിരുന്നു. അപകടങ്ങള്‍ തുടര്‍ക്കഥയായിട്ടും  സുരക്ഷക്കായി കൂടുതല്‍ നടപടികളെടുക്കുന്നതിനെ കുറിച്ചുള്ള ആലോചനകള്‍ പോലും ഉദ്യോഗസ്ഥ തലത്തില്‍ നടന്നിട്ടില്ല.