കവിത: ടി പത്മനാഭന്‍
കണ്ണൂര്‍: അക്ഷര വിഹീനരായവരും ഒരു വാചകം പോലും തെറ്റുകൂടാതെ എഴുതാന്‍ അറിയാത്തവരും വിഹരിക്കുന്ന ഇടമായി കവിതകള്‍ മാറിയതായി കഥാകൃത്ത് ടി പത്മനാഭന്‍. കണ്ണൂരില്‍ അങ്കണം സാംസ്‌കാരിക വേദിയുടെ പുസ്തക പ്രകാശനവും പുരസ്‌കാരദാനവും ഉദ്ഘാടനം ചെയ്യുകയായിരുന്നു അദ്ദേഹം. വ്യാകരണ ശുദ്ധിയില്ലാത്ത വാചകം മൂന്നായി മുറിച്ച് അട്ടിവയ്ക്കുന്ന ഒന്നല്ല കവിത. ഇന്ന് ആര്‍ക്കും ചെയ്യാവുന്ന കര്‍മമായി കവിതയെഴുത്ത് മാറി. ഭാഷയെ സ്‌നേഹിക്കുന്നവര്‍ക്ക് സഹിക്കാന്‍ കഴിയാത്തതാണ് ഇപ്പോഴത്തെ കവിതകള്‍. സ്വന്തം കൈയ്യില്‍ നിന്ന് കാശ് മുടക്കിയാണ് ഇവര്‍ പുസ്തകം പ്രസിദ്ധീകരിക്കുക. ചില 'വഷളന്മാര്‍' ഇത്തരം കവിതകളെ ഗംഭീരമെന്ന് പറഞ്ഞ് അവതാരിക എഴുതുന്നുണ്ടെന്നും അദ്ദേഹം പറഞ്ഞു.
അമൃത കേളകം രചിച്ച '21 കവിതകള്‍' എന്ന പുസ്തകം എ.വി പവിത്രനു നല്‍കി ടി പത്മനാഭന്‍ പ്രകാശനം ചെയ്തു. പ്രൊഫ. ബി മുഹമ്മദ് അഹമ്മദ് അധ്യക്ഷനായി. ആര്‍.ഐ ഷംസുദ്ദീന്‍ സംസാരിച്ചു. അങ്കണം സംസ്ഥാനതലത്തില്‍ സംഘടിപ്പിച്ച കഥാ-കവിത വിജയികള്‍ക്കുള്ള സമ്മാനവും വിതരണം ചെയ്തു.