സിഡ്‌നി: ആസ്‌ത്രേലിയയിലെ സിഡ്‌നിയിലുണ്ടായ ട്രെയിന്‍ അപകടത്തില്‍ 16 പേര്‍ക്ക് പരുക്ക്. സിഡ്‌നിയുടെ വടക്കുപടിഞ്ഞാറേ ഭാഗത്തെ റിച്ച്‌മോണ്ട് റെയില്‍വേ ലൈനിലാണ് അപകടമുണ്ടായത്. പ്രാദേശിക സമയം രാവിലെ 10നാണ് അപകടം നടന്നത്.

അതിവേഗതയില്‍ വന്ന ട്രെയിന്‍ റെയില്‍വേ ലൈനിന്റെ സ്റ്റോപ്പറില്‍ ചെന്നിടിക്കുകയായിരുന്നു. അപകടത്തില്‍ ഒരാളുടെ കാല്‍ ഒടിയുകയും 16 പേര്‍ക്ക് സാരമായ പരുക്കേല്‍ക്കുകയും ചെയ്തതായി അധികൃതര്‍ അറിയിച്ചു. പരുക്കേറ്റവരെ സമീപത്തുള്ള ആശുപത്രിയില്‍ പ്രവേശിപ്പിച്ചിരിക്കുകയാണ്.

ട്രെയിന്‍ പാളം തെറ്റിയതല്ല, അതിവേഗതയില്‍ വന്ന് സ്റ്റോപ്പറില്‍ ഇടിക്കുയായിരുന്നുവെന്ന് ദൃക്‌സാക്ഷികള്‍ പറഞ്ഞതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നു. സംഭവത്തെ കുറിച്ച് അന്വേഷണത്തിന് ഉത്തരവിട്ടതായി അധികൃതര്‍ അറിയിച്ചു.