ബൊഗോട്ട: കൊളംബിയയിലുണ്ടായ മണ്ണിടിച്ചിലില്‍ 13 മരണം. മണ്ണിടിച്ചിലിനെ തുടര്‍ന്ന് ബസ് മറിഞ്ഞാണ് അപകടം. ഇക്വഡോര്‍ അതിര്‍ത്തിയില്‍ ഞായറാഴ്ച രാത്രിയാണ് സംഭവം. മരിച്ചവരില്‍ രണ്ടു പേര്‍ സ്ത്രീകളും രണ്ടുപേര്‍ കുട്ടികളുമാണ്. ഇക്വഡോര്‍ അതിര്‍ത്തിക്കു സമീപം നാരിനോ മേഖലയിലൂടെ പോകുകയായിരുന്ന ബസ് റോഡ് ഇടിഞ്ഞതിനെ തുടര്‍ന്ന് താഴ്ചയിലേക്ക് മറിയുകയായിരുന്നു. രക്ഷാപ്രവര്‍ത്തകര്‍ 10 മൃതദേഹങ്ങള്‍ കണ്ടെടുത്തിട്ടുണ്ട്.
രാജ്യത്തെ പ്രധാന നഗരമായ പാസ്‌തോയില്‍ നിന്നും 66 കിലോമീറ്റര്‍ അകലെ ഡെവിള്‍സ് നോസിലാണ് സംഭവം. വാഹനത്തില്‍ എത്ര യാത്രക്കാരുണ്ടായിരുന്നുവെന്നതിനെക്കുറിച്ച് കൃത്യമായ വിവരം ലഭിച്ചിട്ടില്ലെന്ന് ബന്ധപ്പെട്ടവര്‍ അറിയിച്ചു. കുത്തനെയുള്ള ഇറക്കമായതിനാല്‍ ഞായറാഴ്ച രാത്രി നിര്‍ത്തിവച്ച രക്ഷാപ്രവര്‍ത്തനം തിങ്കളാഴ്ചയും തുടരുകയാണ്.