കോഴിക്കോട്: സംസ്ഥാനത്തെ 2600 ഓളം ചെറുകിട ക്വാറികള്‍ അടച്ചുപൂട്ടിയതിന്റെ ഭാഗമായി നിര്‍മാണ മേഖല സ്തംഭിച്ചിരിക്കയാണെന്നും വന്‍കിട ക്രഷര്‍ ലോബികളെ സഹായിക്കാനാണ് പ്രതിസന്ധിക്ക് പരിഹാരം കാണാത്തതെന്നും ആരോപണം.
ചെറുകിട കരിങ്കല്‍ ക്വാറി അസോസിയേഷന്‍ (എസ്.എസ്.ക്യു.എ.) സംസ്ഥാന ഭാരവാഹികള്‍ വാര്‍ത്താ സമ്മേളനത്തിലാണ് ഇക്കാര്യം പറഞ്ഞത്. എല്ലാ മാനദണ്ഡങ്ങളും കാറ്റില്‍ പറത്തി വന്‍കിട ക്രഷര്‍ മാഫിയ നിത്യേന കരിങ്കല്‍ ഉല്‍പ്പന്നങ്ങളുടെ വില വര്‍ധിപ്പിച്ച് കൊള്ള നടത്തുകയാണ്. ചെറുകിടമേഖലയില്‍ ജോലി ചെയ്യുന്ന തൊഴിലാളികള്‍ അര്‍ധപട്ടിണിയിലാണ്.
1967 മുതല്‍ നിയമപരമായ അനുമതികളോടെ പ്രവര്‍ത്തിച്ചുവരുന്ന 2600 ഓളം ക്വാറികള്‍ അടച്ചുപൂട്ടിച്ച് 100 ഓളം വരുന്ന വന്‍കിട ക്രഷര്‍ മാഫിയക്ക് വേണ്ടി നിയമനിര്‍മാണം നടത്തിയതാണ് ഇന്നത്തെ പ്രതിസന്ധിക്ക് കാരണമെന്നും നേതാക്കള്‍ പറഞ്ഞു.
സര്‍ക്കാര്‍, റവന്യൂ പുറമ്പോക്ക് ഭൂമികളില്‍ വന്‍കിട ഖനനം നടത്തുന്നവര്‍ക്ക് ടണ്‍ ഒന്നിന് 200 രൂപ ഉണ്ടായിരുന്നത് 50 രൂപയാക്കി കുറച്ച് നല്‍കിയത് വന്‍കിട മാഫിയയെ സഹായിക്കാനാണ്. വന്‍കിട ക്വാറികള്‍ സംസ്ഥാനത്തെ വിവിധ രാഷ്ട്രീയക്കാരുടെ ബിനാമികളാണ് നടത്തുന്നത്.
ഇവരില്‍ എം.എല്‍.എ മാര്‍ പോലുമുണ്ട്. ഈ മേഖല സംരക്ഷിക്കാന്‍ സര്‍ക്കാര്‍ അടിയന്തരമായി തയാറാകാത്ത പക്ഷം ശക്തമായ പ്രക്ഷോഭപരിപാടികള്‍ക്ക് രൂപം നല്‍കും.
ചെറുകിട കരിങ്കല്‍ ക്വാറി അസോസിയേഷന്‍ സംസ്ഥാന ജനറല്‍ സെക്രട്ടറി എം. കെ. ബാബു, ട്രഷറര്‍ എ.കെ. ഡേവിസണ്‍, സംസ്ഥാന വൈസ് പ്രസിഡണ്ട് പി.വി ജോര്‍ജ്, സംസ്ഥാന കമ്മറ്റി മെമ്പര്‍മാരായ ഹരികുമാര്‍ മഞ്ചേരി, ഹരിദാസ് നന്മണ്ട, കെ.പി. മുഹമ്മദലി പെരിന്തല്‍മണ്ണ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.