കോഴിക്കോട്: ഉയരമുള്ള പെണ്‍കുട്ടികള്‍ക്ക് വോളിബോള്‍ താരമാകാനുള്ള അവസരം സ്‌പോര്‍ട്‌സ് അതോറിറ്റി ഓഫ് ഇന്ത്യ (സായ്) ഒരുക്കുന്നു. ഹൈറ്റ് ഹണ്ട് എന്ന സായ് പദ്ധതി സംസ്ഥാനത്തിന്റെ വിവിധ ഭാഗങ്ങളില്‍ ഈ മാസം 27 മുതല്‍ ഫെബ്രുവരി 11 വരെ അരങ്ങേറും. 13 മുതല്‍ 16 വയസ് വരെയുള്ള ഉയരമുള്ള പെണ്‍കുട്ടികള്‍ക്ക് അപേക്ഷിക്കാം. മുന്‍ പരിചയം ആവശ്യമില്ല. വോളിബോളില്‍ താത്പര്യമുള്ള 171, 175, 180 സെ.മീറ്ററോ അതിലധികമോ ഉയരമുള്ള പെണ്‍കുട്ടികള്‍ക്കാണ് അവസരം. 27ന് കാസര്‍ക്കോട് നീലേശ്വരം രാജാസ് ഹൈസ്‌കൂളിലും 28ന് കണ്ണൂര്‍ പേരാവൂര്‍ ജിമ്മി ജോര്‍ജ് സ്‌പോര്‍ട്‌സ് അക്കാദമിയിലും 29ന് കോഴിക്കോട് ജില്ലയിലെ ഗവ. ഹയര്‍ സെക്കന്‍ഡറി സ്‌കൂള്‍ താമരശ്ശേരിയിലും ഫെബ്രുവരി മൂന്നിന് കോട്ടയം പാല സെന്റ് തോമസ് കോളജിലും നാലിന് കൂത്താട്ടുകുളം ഇടയാറിലുള്ള ഇഫാന്‍സ് ക്ലബിലും അഞ്ചിന് തൃശൂര്‍ പേരാമംഗലം എസ്.ഡി.വി ഹയര്‍ സെക്കന്‍ഡറി സ്‌കൂളിലും 10ന് കൊല്ലം അഞ്ചല്‍ ഗവ. ഹയര്‍ സെക്കന്‍ഡറി സ്‌കൂളിലും 11ന് തിരുവനന്തപുരം സായ് സെന്ററിലും ഹൈറ്റ് ഹണ്ട് അരങ്ങേറും. തിരഞ്ഞെടുക്കപ്പെടുന്നവര്‍ക്ക് ശാസ്ത്രീയ പരിശീലനം, സൗജന്യ ഭക്ഷണം, താമസം, കായികോപകരണങ്ങള്‍, വിദ്യാഭ്യാസം, മെഡിക്കല്‍ സൗകര്യം എന്നിവ ലഭിക്കും. വയസ് തെളിയിക്കുന്ന രേഖ, മെഡിക്കല്‍ സര്‍ട്ടിഫിക്കറ്റ്, റേഷന്‍ കാര്‍ഡിന്റെ കോപ്പി, രണ്ട് പാസ്‌പോര്‍ട് സൈസ് ഫോട്ടോ സഹിതം ഹൈറ്റ് ഹണ്ട് നടക്കുന്ന കേന്ദ്രത്തില്‍ ഹാജരാകേണ്ടതാണ്. വിശദ വിവരങ്ങള്‍ക്ക് 9447794079 നമ്പറില്‍ വിളിക്കുക.