തിരുവനന്തപുരം: ശ്രീജിവിന്റെ കസ്റ്റഡി മരണത്തില്‍ സി.ബി.ഐ അന്വേഷണമാവശ്യപ്പെട്ട് സെക്രട്ടേറിയറ്റിന് മുന്നില്‍ നടത്തുന്ന സമരം സി.ബി.ഐ ഉദ്യോഗസ്ഥര്‍ വന്ന് മൊഴിയെടുത്താല്‍ അവസാനിപ്പിക്കുമെന്ന് സഹോദരന്‍ ശ്രീജിത്ത് അറിയിച്ചു. കുറ്റക്കാരായ ഉദ്യോഗസ്ഥര്‍ സര്‍വിസില്‍ തുടരുകയാണ്. ഇവരെ എത്രയും വേഗം അന്വേഷണവിധേയമായി സര്‍വിസില്‍നിന്ന് മാറ്റിനിര്‍ത്തണമെന്നും ശ്രീജിത്ത് പറഞ്ഞു.
സി.ബി.ഐ അന്വേഷണം പ്രഖ്യാപിച്ച സാഹചര്യത്തില്‍ ശ്രീജിത്തിന് പിന്തുണയുമായി സമരം നടത്തിവന്ന ഫേസ്ബുക്ക് കൂട്ടായ്മ കഴിഞ്ഞദിവസം സമരം അവസാനിപ്പിച്ചിരുന്നു. ശ്രീജിത്തിനൊപ്പം പിന്തുണയറിയിച്ചെത്തിയ ഏതാനും പേര്‍ മാത്രമാണ് ഇപ്പോള്‍ സമരവേദിയിലുള്ളത്.