വാഷിങ്ടണ്‍: ഉത്തരകൊറിയക്കെതിരേ കൂടുതല്‍ ഉപരോധവുമായി യു.എസ്. ഉത്തരകൊറിയ ആണവായുധ പരീക്ഷണങ്ങള്‍ അവസാനിപ്പിക്കാനാണ് പുതിയ ഉപരോധം യു.എസ് ഏര്‍പ്പെടുത്തിയത്. കൂടാതെ ഉത്തരകൊറിയക്ക് സഹായം നല്‍കുന്നതില്‍ നിന്ന് റഷ്യ, ചൈന എന്നീ രാജ്യങ്ങള്‍ പിന്മാറണമെന്ന് യു.എസ് ആവശ്യപ്പെട്ടു.
16 വ്യക്തികള്‍, ആറു ഉത്തരകൊറിയന്‍ കപ്പലുകള്‍, ഒന്‍പത് സംരംഭങ്ങള്‍ എന്നിവക്കാണ് യു.എസ് ട്രഷറി ഉപരോധം ഏര്‍പ്പെടുത്തിയത്. ഉത്തരകൊറിയയുടെ ആയുധ നിര്‍മാണങ്ങള്‍ക്കായി സഹായം നല്‍കിയെന്ന ആരോപണമാണ് ഇവര്‍ക്കെതിരേയുള്ളത്. ചൈന അടിസ്ഥാനമായി പ്രവര്‍ത്തിക്കുന്ന രണ്ട് കമ്പനികള്‍ ദശലക്ഷക്കണക്കിന് ഡോളറുകളുടെ ലോഹങ്ങള്‍ ഉത്തരകൊറിയയിലേക്ക് ഇറക്കുമതി ചെയ്‌തെന്ന് യു.എസ് ആരോപിച്ചു.
ഉത്തരകൊറിയന്‍ കമ്മ്യൂണിസ്റ്റ് പാര്‍ട്ടിയായ വര്‍ക്കേഴ്‌സ് പാര്‍ട്ടി ഓഫ് ഉത്തരകൊറിയയുടെ ചൈന,റഷ്യ, ജോര്‍ജിയ എന്നിവിടങ്ങളിലെ അംഗങ്ങളും ഉപരോധ പട്ടികയിലുണ്ട്. കൂടാതെ റഷ്യയിലെ ഉത്തരകൊറിയന്‍ വൈസ് കോണ്‍സുലും ഉപരോധമേര്‍പ്പെടുത്തിയവരിലുണ്ട്. ഉത്തരകൊറിയന്‍ ഭരണാധികാരി കിം ജോങ് ഉന്നിനെ സഹായിച്ച വ്യക്തികള്‍ക്കും സംരംഭങ്ങള്‍ക്കുമെതിരേയുള്ള ഉപരോധങ്ങള്‍ തുടരുമെന്ന് യു.എസ് ട്രഷറി ഡിപ്പാര്‍ട്ട്‌മെന്റ് സെക്രട്ടറി സ്റ്റീവന്‍ നഷിന്‍ പറഞ്ഞു. ഉത്തരകൊറിയക്ക് സാമ്പത്തിക സഹായം നല്‍കുന്ന മുഴുവന്‍ വിഭാഗങ്ങളെയും യു.എസ് സര്‍ക്കാര്‍ പിന്തുടരും. അത്തരക്കാരെ ബഹിഷ്‌കരിക്കണമെന്ന് ആവശ്യപ്പെടുകയാണെന്ന് സ്റ്റീവ് നഷിന്‍ പറഞ്ഞു.
എന്നാല്‍ യു.എന്‍ തീരുമാനത്തിന് വിരുദ്ധമായി രാജ്യത്തെ ഏതെങ്കിലും വ്യക്തികളോ കമ്പനികളോ പ്രവര്‍ത്തിച്ച കാര്യം അറിയില്ലെന്ന് ചൈനീസ് വക്താവ് ഹുവാ ചുയിങ് പറഞ്ഞു. ഇത്തരത്തില്‍ ഏതെങ്കിലും സംഭവമുണ്ടോയെന്ന കാര്യം ചൈന അന്വേഷിക്കുമെന്നും അവര്‍ പറഞ്ഞു.
ആണവായുധ ഭീഷണി തുടര്‍ന്നതിനാല്‍ ഉത്തരകൊറിയക്കെതിരേയുള്ള ഉപരോധം ശക്തിപ്പെടുത്താന്‍ യു.എസ് അന്താരാഷ്ട്ര തലത്തില്‍ ആവശ്യപ്പെട്ടിരുന്നു. ഭൂഖണ്ഡേതര മിസൈല്‍ പരീക്ഷിച്ചതിനാല്‍ ഡിസംബറില്‍ ഉത്തരകൊറിയക്കെതിരേ യു.എന്‍ എതിര്‍പ്പില്ലാതെ ഉപരോധം ഏര്‍പ്പെടുത്തിയിരുന്നു. ഇതിന് പുറമെയാണ് യു.എസ് പുതിയ ഉപരോധം ഏര്‍പ്പെടുത്തിയിരിക്കുന്നത്.