തിരുവനന്തപുരം: കേരളത്തിലെ സി.ബി.എസ്.ഇ, ഐ.സി.എസ്.ഇ സ്‌കൂളുകളിലെ വിദ്യാര്‍ഥികള്‍ക്കായി സംസ്ഥാന സ്‌പോര്‍ട്‌സ് കൗണ്‍സില്‍ സംഘടിപ്പിക്കുന്ന ആദ്യ കായിക മേളയായ കേരള സംസ്ഥാന സെന്‍ട്രല്‍ സ്‌കൂള്‍ സ്‌പോര്‍ട്‌സ് മീറ്റ് ഈ മാസം 30, 31 തിയതികളില്‍ നടക്കും. തിരുവനന്തപുരം ചന്ദ്രശേഖരന്‍ നായര്‍ സ്റ്റേഡിയത്തില്‍ 30ന് വൈകിട്ട് ആറ് മണിക്ക് മുഖ്യമന്ത്രി പിണറായി വിജയന്‍ കായിക മേള ഉദ്ഘാടനം ചെയ്യും.
മത്സരങ്ങള്‍ 30ന് രാവിലെ 7.30ന് തുടങ്ങും. രാജ്യത്ത് സെന്‍ട്രല്‍ സ്‌കൂള്‍ സ്‌പോര്‍ട്‌സ് മീറ്റ് സംഘടിപ്പിക്കുന്ന ആദ്യ സംസ്ഥാനമായി കേരളം മാറും. സെന്‍ട്രല്‍ സ്‌കൂള്‍ സിലബസ് അടിസ്ഥാനമാക്കി അധ്യയനം നടക്കുന്ന കേരളത്തിലെ സി.ബി.എസ്.ഇ, ഐ.സി.എസ്.ഇ സ്‌കൂളുകള്‍, കേന്ദ്രീയ വിദ്യാലയങ്ങള്‍, ജവഹര്‍ നവോദയ വിദ്യാലയങ്ങള്‍ എന്നിവിടങ്ങളിലെ വിദ്യാര്‍ഥികളാണ് കായിക മേളയില്‍ പങ്കെടുക്കുക.
സംസ്ഥാന സിലബസ് പഠിപ്പിക്കുന്ന സ്‌കൂളുകള്‍ക്ക് സ്‌പോര്‍ട്‌സ് കൗണ്‍സിലിന്റെ നേതൃത്വത്തില്‍ മികച്ച കായിക മേളകളുണ്ടെങ്കിലും കേന്ദ്ര സിലബസ് വിദ്യാര്‍ഥികള്‍ക്ക് കായിക ശേഷി തെളിയിക്കാനുള്ള മികച്ച മേളകളില്ല എന്ന പോരായ്മ പരിഹരിക്കാനാണ് സ്‌പോര്‍ട്‌സ് കൗണ്‍സില്‍ സെന്‍ട്രല്‍ സ്‌കൂള്‍ സ്‌പോര്‍ട്‌സ് മീറ്റ് എന്ന ആശയം നടപ്പാക്കുന്നത്. അണ്ടര്‍ 14, അണ്ടര്‍ 17 വിഭാഗങ്ങളില്‍ ആണ്‍കുട്ടികള്‍ക്കും പെണ്‍കുട്ടികള്‍ക്കും മത്സരമുണ്ടാകും. ഓരോ വിഭാഗത്തിലും മികച്ച അത്‌ലറ്റിനെയും ചാംപ്യന്‍ ടീമിനെയും ഓവറോള്‍ ചാംപ്യന്മാരെയും തിരഞ്ഞെടുക്കും. വിജയികള്‍ക്ക് മെഡലുകളും സര്‍ട്ടിഫിക്കറ്റും നല്‍കും. ഉദ്ഘാടനത്തോടനുബന്ധിച്ച് നടക്കുന്ന മാര്‍ച്ച് പാസ്റ്റിലെ മികച്ച പ്രകടനത്തിനും ട്രോഫി നല്‍കും. സംസ്ഥാന മീറ്റിന് മുന്നോടിയായി ജില്ലാ മീറ്റുകള്‍ സംഘടിപ്പിച്ചിരുന്നു.
ഇതില്‍ ആദ്യ മൂന്നു സ്ഥാനങ്ങള്‍ നേടിയവരാണ് സംസ്ഥാനമേളയില്‍ പങ്കെടുക്കുന്നത്. ആദ്യ വര്‍ഷം അത്‌ലറ്റിക്‌സ് മത്സരങ്ങള്‍ മാത്രമാണ്. വരും വര്‍ഷങ്ങളില്‍ എല്ലായിനത്തിലും മത്സരങ്ങളുണ്ടാകുമെന്ന് സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ പത്രസമ്മേളനത്തില്‍ പറഞ്ഞു.