കുറ്റ്യാടി: കുറ്റ്യാടി പുഴയുടെ മിക്ക ഭാഗങ്ങളും വറ്റിവരണ്ടതോടെ മലയോര മേഖലയില്‍ ജലക്ഷാമം രൂക്ഷം. കൈവഴിയായ ചെറുപുഴയില്‍ ഒഴുക്ക് നന്നേ കുറഞ്ഞു.

കുറ്റ്യാടിപ്പുഴയില്‍ ഏറ്റവും കൂടുതല്‍ ജലം നിറഞ്ഞുനില്‍ക്കാറുള്ള തോടത്താംകണ്ടി, ചവറമുഴി തുടങ്ങിയ ഭാഗങ്ങളില്‍ വേനല്‍കനക്കും മുമ്പേ വറ്റി. ഇവിടെ മണലും പാറക്കല്ലുകളും പുറത്തായ നിലയിലായിലാണ്. വര്‍ഷകാലത്ത് നിറഞ്ഞുകവിഞ്ഞൊഴുകുകയും ശക്തമായ കുത്തൊഴുക്കിനാല്‍ ഭയപ്പെടുത്തുകയും ചെയ്യുന്ന പുഴയുടെ പല ഭാഗങ്ങളും കേവലം ആണിച്ചാല്‍(നീര്‍ച്ചാല്‍) മാത്രമായി അവശേഷിച്ചിരിക്കുന്നു.
പുഴയിലെ ജലനിരപ്പ് താണതോടെ തീരപ്രദേശങ്ങളിലെ  കിണറുകള്‍ വറ്റി കുടിവെള്ളക്ഷാമം രൂക്ഷമായ അവസ്ഥയാണ്. മുന്‍ കാലങ്ങളില്‍ ഒരിക്കലുമില്ലാത്ത തരത്തില്‍ പുഴയുടെ നടുക്ക് തടയണ നിര്‍മിച്ച് വെള്ളം കെട്ടിനിര്‍ത്തിയിരിക്കയാണ് നാട്ടുകാര്‍.

മലയോര മേഖലയിലെ പ്രധാന പുഴകളായ ചാത്തന്‍ങ്കോട്ടുനട പുഴ, പട്ട്യാട്ട്, കടന്തറപ്പുഴ, കരിങ്ങാട്പുഴ തുടങ്ങിയവ ഏതാണ്ട്  മുഴുവന്‍ പുഴകളുടെയും സ്ഥിതി വ്യത്യസ്തമല്ല. അരുവികളും, പ്രകൃതിദത്ത പാറ ഉറവകളും മുഴുവനായും വറ്റിവരണ്ടു കഴിഞ്ഞു. വരും ദിവസങ്ങളില്‍ വേനല്‍ കനക്കുന്നതോടെ കുറ്റ്യാടിപ്പുഴയുടെ അവശേഷിക്കുന്ന ഭാഗം കൂടി മണല്‍ക്കാടാവും. വാട്ടര്‍ അതോറിറ്റി കുടിവെള്ള വിതരണത്തിന് ആശ്രയിക്കുന്ന കുറ്റ്യാടിപ്പുഴയിലെ കിണറും വറ്റുന്ന ഭയാനകമായ സ്ഥിതിയാണ് വരാനിരിക്കുന്നത്.

ഇപ്പോള്‍ തന്നെ കുറ്റ്യാടി പുഴയിലെ കിണറിനു ചുറ്റും വെള്ളം വറ്റി കല്ലുകള്‍ പുറത്തായ നിലയിലാണ്.
വാട്ടര്‍ അതോറിറ്റിയുടെ കുടിവെള്ള വിതരണം പ്രതിസന്ധിയിലാവുന്നതോടെ കുറ്റ്യാടി ഉള്‍പ്പെടെ പത്തോളം പഞ്ചായത്തുകളിലെ ഗ്രാമങ്ങള്‍ വന്‍ ജലക്ഷാമത്തെ അഭിമുഖീകരിക്കേണ്ടിവരും വരാനിരിക്കുന്ന കുടിവെള്ള ക്ഷാമത്തെ നേരിടാന്‍ തദ്ദേശ സ്വയംഭരണ സ്ഥാപനങ്ങള്‍ ക്രിയാത്മകമായ മുന്‍കരുതല്‍ സ്വീകരിക്കുന്നില്ലെന്ന് ആക്ഷേപം വ്യാപകമാണ്.