വാഷിങ്ടണ്‍: പറന്നുകൊണ്ടിരുന്ന വിമാനത്തിന്റെ എന്‍ജിന്‍ തകരാറിലായതിനെ തുടര്‍ന്ന് വിമാനം അടിയന്തരമായി ഹൈവേയില്‍ ഇറക്കി. കാലിഫോര്‍ണിയയിലെ ഡെല്‍മാര്‍ സിറ്റിയിലാണ് സംഭവം. വിമാനം ഇറക്കുന്ന സമയത്ത് ഹൈവേയില്‍ ആളുകള്‍ കുറവായതിനാല്‍ ആര്‍ക്കും പരുക്കേറ്റിട്ടില്ല.
ഇസ്സിന സ്‌ലോഡ് എന്ന പൈലറ്റാണ് ചെറുവിമാനം അടിയന്തര ലാന്‍ഡിങ് നടത്തിയത്. ഇദ്ദേഹത്തിന്റെ സുഹൃത്തും വിമാനത്തിലുണ്ടായിരുന്നു. സാന്റിയാഗോയില്‍നിന്ന് വാന്‍ നൂയിസിലേക്ക് പോവുകയായിരുന്നു വിമാനം. പറന്നുകൊണ്ടിരിക്കെയാണ് വിമാനത്തിന്റെ എന്‍ജിന്‍ തകരാര്‍ ശ്രദ്ധയില്‍പ്പെട്ടത്. സംഭവം ഇസ്സിന സ്‌ലോഡ് എയര്‍ ട്രാഫിക് കണ്‍ട്രോളറെ അറിയിച്ചു. എന്‍ജിന്‍ തകരാറിലായതിനാല്‍ വിമാനം ഹൈവേയില്‍ ഇറക്കുകയാണെന്നാണ് പൈലറ്റ് അറിയിച്ചത്. വിമാനം ലാന്‍ഡ് ചെയ്തത് പൂര്‍ണമായും അത്ഭുതകരമായിരുന്നുവെന്ന് ഇസ്സിന സ്‌ലോഡ് പിന്നീട് മാധ്യമപ്രവര്‍ത്തകരോട് പറഞ്ഞു.
ഹൈവേയില്‍ തുറന്ന പ്രദേശം കണ്ടതിനെ തുടര്‍ന്നു വിമാനം ലാന്‍ഡ് ചെയ്യുകയായിരുന്നുവെന്ന് ഇസ്സിന പറഞ്ഞു. സംഭവത്തില്‍ ഫെഡറല്‍ ഏവിയേഷന്‍ അഡ്മിനിസ്‌ട്രേഷന്‍ അന്വേഷണം ആരംഭിച്ചു.