ബാലുശ്ശേരി: കാക്കൂര്‍ പൊലിസ് സ്റ്റേഷന്‍ പരിധിയിലെ കുട്ടമ്പൂരിലും പരിസര പ്രദേശങ്ങളിലും മോഷ്ടാക്കള്‍ വിലസുന്നു. കഴിഞ്ഞ ഏതാനും ദിവസങ്ങളായി പ്രദേശത്തെ പല വീടുകളിലും മോഷണ ശ്രമങ്ങള്‍ നടക്കുകയാണ്.
കുട്ടമ്പൂര്‍ ഹൈസ്‌കൂളിനടുത്ത് ടി.കെ രാജേന്ദ്രന്‍ മാസ്റ്ററുടെ വീട്ടില്‍ മോഷണം നടന്നു. വീട് പൂട്ടി പുറത്തുപോയ തക്കത്തിലായിരുന്നു മോഷണം. ഗ്രില്ലുകളും വാതിലുകളും തകര്‍ത്തു അകത്തു കയറിയ മോഷ്ടാക്കള്‍ അലമാരയില്‍ സൂക്ഷിച്ചിരുന്ന പതിനേഴര പവന്‍ സ്വര്‍ണാഭരണവും പതിനാറായിരം രൂപയും കവര്‍ന്നു. കാക്കൂര്‍ പൊലിസ് അന്വേഷണം ആരംഭിച്ചിട്ടുണ്ട്. മോഷ്ടാക്കളുടെ ശല്യം കാരണം നാട്ടുകാര്‍ പരിഭ്രാന്തിയിലാണ്.
മോഷണം തടയുന്നതിന് കുട്ടമ്പൂരില്‍ യുവാക്കള്‍ സ്‌ക്വാഡ് രൂപീകരിച്ച് രാത്രികാല കാവല്‍ ഏര്‍പ്പെടുത്തിയിട്ടുണ്ട്. രാത്രി കാലങ്ങളില്‍ പൊലിസ് പെട്രോളിങ് നടത്തണമെന്നും ഇവര്‍ ആവശ്യപ്പെടുന്നു.