ഏറ്റുമാനൂര്‍: സ്ത്രീകള്‍ക്കും കുട്ടികള്‍ക്കും എതിരേയുള്ള അതിക്രമങ്ങള്‍ തടയാന്‍ ലക്ഷ്യമിട്ടുള്ള 'നിര്‍ഭയ' പദ്ധതിയുടേതെന്ന പേരില്‍ പ്രചരിക്കുന്നത് മറ്റേതോ ഫോണ്‍ നമ്പര്‍. സമൂഹമാധ്യമങ്ങളില്‍ നിര്‍ഭയയുടേതായി പ്രചരിക്കുന്ന സന്ദേശം ജനങ്ങളില്‍ പരക്കെ തെറ്റിദ്ധാരണ പരത്തിയിരിക്കുകയാണ്. സ്ത്രീകളും പെണ്‍കുട്ടികളും ഏതെങ്കിലും അപകടഘട്ടത്തിലാണെങ്കില്‍ 9833312222 എന്ന മൊബൈല്‍ നമ്പരില്‍ മിസ്ഡ് കോളോ അല്ലെങ്കില്‍ ഒരു ബ്ലാങ്ക് മെസേജോ ചെയ്താല്‍ പൊലിസ് സ്ഥലം കണ്ടെത്തി സഹായിക്കുമെന്നാണ് സന്ദേശം. കേരളാ പൊലിസിന്റെ പേരില്‍ പ്രചരിക്കുന്ന സന്ദേശം കണ്ട് വിളിച്ചവര്‍ക്കെല്ലാം നമ്പര്‍ നിലവിലില്ലെന്ന മറുപടിയാണ് ലഭിച്ചത്.
'നിര്‍ഭയ'യുടെ നമ്പരും സന്ദേശവും ആണെന്നു കരുതി സമൂഹമാധ്യമങ്ങളില്‍ ഷെയര്‍ ചെയ്തവരില്‍ പൊലിസ് ഉദ്യോഗസ്ഥരും ഉള്‍പ്പെടുന്നുണ്ട്. അതേസമയം 'നിര്‍ഭയ'യുടെ പേരില്‍ ഇത്തരമൊരു സന്ദേശം നല്‍കിയിട്ടില്ലെന്നും ഈ നമ്പരിന് 'നിര്‍ഭയ'യുമായി ബന്ധമൊന്നുമില്ലെന്നുമാണ് വനിതാ ഹെല്‍പ് ലൈനില്‍ നിന്ന് അറിയുവാന്‍ കഴിഞ്ഞത്. സാമൂഹ്യനീതി വകുപ്പിന് കീഴിലുള്ള 'മിത്ര'യുമായും (ടോള്‍ ഫ്രീ നമ്പര്‍ 181) വനിതാ ഹെല്‍പ് ലൈനുമായും ഇത്തരം പ്രശ്‌നങ്ങള്‍ക്ക് ബന്ധപ്പെടാവുന്നതാണെന്ന് ഒരു ഉദ്യോഗസ്ഥ വെളിപ്പെടുത്തി.