തിരുവനന്തപുരം: രാജ്യത്തെ ഗ്രാമപ്രദേശങ്ങളില്‍ ഡോക്ടര്‍മാരുടെ കുറവ് നിലനില്‍ക്കുന്നതായി ഐ.എം.എ. ഇതു നികത്താന്‍ കൂടുതല്‍ ഡോക്ടര്‍മാരെ നിയമിക്കണമെന്ന് കോവളത്ത് രണ്ടു ദിവസങ്ങളിലായി നടന്ന ഐ.എം.എ ദേശീയ നേതൃയോഗം സര്‍ക്കാരുകളോട് ആവശ്യപ്പെട്ടു. രാജ്യത്തെ വിവിധ സംസ്ഥാനങ്ങളിലെ ഗ്രാമപ്രദേശങ്ങളില്‍ ഡോക്ടര്‍മാരുടെയും മറ്റ് ആരോഗ്യപ്രവര്‍ത്തകരുടെയും കുറവ് താല്‍ക്കാലികമായെങ്കിലും നിലനില്‍ക്കുന്നുണ്ട്. രാജ്യത്തെ വിവിധ മെഡിക്കല്‍ കോളജുകളില്‍നിന്ന് പുറത്തുവരുന്ന ഡോക്ടര്‍മാരുടെ എണ്ണം ആവശ്യമുള്ള ഡോക്ടര്‍മാരുടെ എണ്ണത്തിന് ഒപ്പമെത്താന്‍ അധികകാലം വേണ്ടി വരില്ലെന്നും യോഗം വിലയിരുത്തി. അഞ്ചു വര്‍ഷത്തിനകം തന്നെ ആധുനിക വൈദ്യശാസ്ത്രത്തിലെ ബിരുദധാരികളുടെ എണ്ണം ലോകാരോഗ്യ സംഘടന പറയുന്ന നിരക്കിലേക്ക് എത്തിച്ചേരും. അതിനാല്‍ മറ്റു വൈദ്യശാസ്ത്ര ശാഖകളില്‍നിന്ന് അശാസ്ത്രീയ പരിശീലനങ്ങളിലൂടെ ആധുനിക വൈദ്യശാസ്ത്രത്തിലേക്ക് പ്രവേശനം നല്‍കുന്ന ബ്രിഡ്ജ് കോഴ്‌സ് നിര്‍ത്തണം. ഇതു രാജ്യത്തിന്റെ ചികിത്സാ രംഗത്തെ താറുമാറാക്കാനേ ഉതകൂ. ഇപ്പോള്‍ നിലവിലുള്ള ഒഴിവുകള്‍ വര്‍ധിപ്പിക്കുകയും ഡോക്ടര്‍മാര്‍ക്കു ചികിത്സക്ക് ആവശ്യമായ അടിസ്ഥാനസൗകര്യങ്ങള്‍ ഒരുക്കുകയും വേണമെന്ന് യോഗം ആവശ്യപ്പെട്ടു.
25 സംസ്ഥാനങ്ങളില്‍ നിന്നായി 100ല്‍ പരം പ്രശസ്ത ഡോക്ടര്‍മാര്‍ നേതൃയോഗത്തില്‍ പങ്കെടുത്തു. 'കേരളത്തിലേക്ക് 'എന്ന മുദ്രാവാക്യവുമായി ഐ.എം.എ പുതിയ പദ്ധതി ആരംഭിക്കുമെന്ന് ദേശീയ പ്രസിഡന്റ് ഡോ. രവി വാങ്കേക്കര്‍ പറഞ്ഞു.